لبلبة لـ عادل إمام في عيد ميلاده: "زعيمنا وحبيبنا.. وأحلى أيام قضيتها معاه"

كتب- محمد أبوالمجد:

هنأت الفنانة لبلبة، الزعيم عادل إمام بعيد ميلاده الـ 83، قائلة: "يا زعيمنا يا حبيبنا، انا أحلى أيام قضيتها معاك".

وقالت "لبلبة" في مداخلة هاتفية لبرنامج "مساء دي إم سي" على فضائية "دي إم سي" اليوم الأربعاء: " اشتغلت مع الفنان عادل إمام في أعمال كثيرة أوي، وأحلى أعمال كانت معاه والناس شجعتنا، وكان آخرها مسلسلات زي مأمون وشركاه وصاحب السعادة".

وتابعت: "عادل إمام شيء ميتكررش في الدنيا دي ربنا أداله موهبة كبيرة، وبشوفه أذكى فنان ومدرسة كبيرة"، موضحة أن العمل مع الزعيم عادل إمام يكون به اطمئنان وراحة نفسية كبيرة، قائلة: "لما بشتغل معاه ببقى متاكدة أن كل حاجه متنظمة لأنه دقيق جدًا في شغله وأتعلمت منه ازاي أختار أدواري وازاي أفكر في سيناريو وأدواري تبقى مختلفة عشان كده عاش عادل في قلوب الملايين طول السنين دي".

وأردفت: "عادل إمام علمني ازاي لازم الإنسان يغير في أدواره عشان يبقى متجدد في عيون الناس، لأن هدفه الدائم كان أنه يبسط الناس وأبدع فيها".

وأوضحت: "لما كنا بنعمل فيلم مع بعض وبروح أتفرج عليه في السينما كنت بقعد وسط الناس في الصالة متخفية، عشان أشوف رأي الناس وكان بعدها يتصل بيا يقولي قوليلي الناس كانت مبسوطة ولا ايه، لأنه كان يهمه فرحة الناس وأنه ينسيهم همومهم".

واختتمت: "هخلص تصوير كمان شوية ورايحه للزعيم عادل إمام عشان نحتفل بعيد ميلاده".