يسرا سلامة تكتب: 40 ملاحظة على دراما وإعلانات رمضان

التفوق ثمرة الجهاد، لا ينالها إلا المتميزون، ولدراما وإعلانات شهر رمضان 2017 اجتهد الكثير، وفي وسط ﺳﻴﻞ ﻣﻦ ﺍإﻋﻼﻧﺎﺕ ﺗﺘﻮﺳﻄﻪ ﻓﻮﺍﺻﻞ ﺩﺭﺍﻣﻴﺔ، بالقنوات ﺍﻟﺨﺎﺻﺔ ﻫﺬﺍ ﺍﻟﻌﺎﻡ، ﺗﻠﻚ ﻣﻼﺣﻈﺎﺗﻲ اﻟﺸﺨﺼﻴﺔ ﺟﺪًﺍ ﻋﻠﻰ ﻣﺎ شاﻫﺪﺗﻪ ﻋﻠﻰ ﺍﻟﻤﺎﺋﺪﺓ ﺍﻟﺮﻣﻀﺎﻧﻴﺔ.

1. أداء محمد ممدوح الصوتي في إعلان فاين فودز "طبق الكرم" أحسن من أدائه في مسلسل "لا تطفئ الشمس".

2. في الحلقة الأولى "لأعلى سعر" ظهر إسلاميين بيزرعوا قنبلة في عوامة "نبيل الحلفاوي".. ده تقريبًا مشهد متكرر من كل أعمال كتبها مدحت العدل، مفهمتش حصل ليه في المسلسل.

3. "واحة الغروب".. أكبر دليل أن المسلسل الـ15 حلقة الحل الأفضل لكتير من الدراما.

4. اللي بيقطعوا مشاهد من مسلسلات رمضان ويكتبوا عليها عناوين ساخنة على يوتيوب، هم مجموعة موظفين بياخدوا فلوس على كده من أصحاب القنوات أو شركات الإنتاج، ودي طريقة رخيصة جدًا عشان نلم مشاهدين للمسلسلات.

5. محتاجين وصفة "نيلي كريم" اللي خلاها تخس في 3 حلقات درامية.

6. "لا تطفئ الشمس"... وما ذنب إحسان عبد القدوس!

7. إعلانات القيمة المضافة والمطبلاتية من إعلانات الدولة.. هتفيدني بإيه لما الأسعار تغلى الشهر الجاي بعد غلاء المواد البترولية؟

8.محتاجين نعرف الإعلانات اللي مصروف عليها كتير جدًا من المنظمات الخيرية فلوسها بتيجي منين؟ هل من المتبرعين؟ (صحيح ليه اختفى شعار اتبرع ولو بجنيه؟ تفتكروا ليه؟).

9. "عائشة" بنت نيلي كريم وأحمد فهمي في "لأعلى سعر" محتاجة تتدرب على التمثيل من "نور" بنت أحمد داوود في "هذا المساء".

10. أغنية "ملعون أبو الناس العزاز".. إهداء إلى نواب تمرير اتفاقية تيران وصنافير.

11. السف والعبث ممكن يعمل مسلسل حلو ويضحك من غير صرف كتير.. عن "ريح المدام".

12. "حلاوة الدنيا".. أعمال "الفورمات" من الأفلام والمسلسلات الأجنبية لطيفة، لكن محتاجة تكون "مصرية" الطابع، وبعيدة عن المطّ والتطويل.

13. طول ما احنا عندنا مسلسلات بتفضل تتصور لغاية 28 رمضان.. طول ما الأخطاء بالجملة هتستمر على الشاشة الصغيرة.

14. خالد كمال .. رجاء الجداوي.. حنان مطاوع.. جايزة أفضل "بيومي فؤاد" لدراما 2017 بس مبنقولش عشان النحت حلو.

15. عن إعلانات التبرعات.. مش لازم تبقى فيديو كليب وعيال فرحانة بالمرض وألوان وبلالين.. حاولوا تبدعوا وتقصروا الحملة.

16. قناة تيستي وبانوراما فود أعلى من cbc سفرة.. والسر في البلدي، أكيد طريقة الرز بالكبدة أهم من الكافيار بالبرتقال.

17. وحيد حامد.. أنت معلم.

18. لأصحاب القنوات الفضائية، طول الإعلانات بينفر الجمهور من التلفزيون، القنوات بتخدم المعلن، وبتسلم الزبون ليه، من غير مراعاة لحقه في مشاهدات دون إزعاج أو ضياع لوقته، وجمهور الانترنت بيزيد من سنة للتانية، فكروا تحافظوا عليه عشان خسايركم ما تكترش.

19. "هذا المساء".. الحصان الأسود الحقيقي للدراما في رمضان 2017، عرف يحقق كل حلقة حدث جديد، بتصوير وإضاءة منضبطة ومناسبين للشخصيات، وأداء تمثيلي مميز حتى من الأدوار التانية، أسماء أبو اليزيد "تقى" ومحمد جمعة "فياض" لامعين جدًا.

20.   "لأعلى سعر".. مسلسل حلو، كان هيبقى أحلى لو بيخرجه حد غير محمد العدل، المونتاج فيه مشاكل وكذلك في ترابط بعض المشاهد.

21. "كفر دلهاب".. لو ده مستوى الرعب في الدراما المصرية، فبلاش تنتجوا رعب تاني.

22.   "في اللالاند".. ليه نضحك على تريقة حمدي الميرغني وسمير غانم على وزن شيماء سيف، و70% من المصريين بيعانوا من زيادة في الوزن؟ "الرقم من الرابطة العربية لجراحات السمنة".

23. إعلان مي كساب لزيت حلوة، من الإعلانات المبهجة السنة دي.

24. إعلان محمد رمضان.. في رأيي أكثر إعلان فيه إبداع في فكرته، وبيخدم الشركة والنجم في نفس الوقت.

25. برنامج مصطفى حسني على النهار "رسالة من الله".. مشفتش برنامج ديني رايق ومعمول حلو كده من فترة كبيرة، حقيقي ألف شكر لكل شخص في فريق عمل البرنامج.

26.   الخمرة زي المية.. ممكن تواعدي راجل غير جوزك وتحسي بتأنيب في الحلقة العشرين.. من إنجازات تامر حبيب في رمضان 2017.

27. محمد شاكر خضير.. يا خسارة المخرج لما يسلم دقنه للمؤلف.

28. أوفة.. محدش بيعملك حساب في إعلان EG bank ..أكتر واحد بيعبر عن الشعب المصري أكتر من برلمانه.

29. 2 مليون جنيه.. جملة ما دفعته شركة أورانج لنقابة الموسيقين لأخذ حقوق الأغنيات القديمة في إعلان هنيدي "واد خلاصة ومية مية".

30. ملحوظة: الفواصل الإعلانية في القنوات الفضائية العربية "إل بي سي- دبي- أبو ظبي" لا تزيد عن 3 دقايق.

31. "كفر دلهاب.. الزيبق.. هربانة منها.. وضع أمني.. أرض جو".. هما أحسن أعمال في رمضان لكل الصحفيين اللي شغالين في إعلام رجل الأعمال أحمد أبو هشيمة، وفي صفحاتهم الفنية، وبيتصلوا بالنقاد يسألوهم عليهم كل يوم، الجمهور أذكى منك كدة والله.

32. برنامج لغسيل سمعة مؤيدي نظام مبارك.. عن "شيخ الحارة" تقدمه بسمة وهبة، البرنامج كمان فورماته مسروق من برنامج "أنت وضميرك" على قناة دريم من سنوات. 

33. هل نجحت إشاعة زواج سمية الخشاب وأحمد سعد في الدعاية لمسلسل "الحلال"؟

34. لغاية رمضان سنة كام هنفضل نشوف مصطفى شعبان؟

35. تعليقات رامز جلال على وزن الفنانة الكويتية "منى شداد" عنصرية وسخيفة ودمها تقيل.

36. بالنسبة ليا، هيفاء وهبي لسة مخرجتش من دكان شحاتة.

37. الإبداع عند محمد السبكي إن تيمة فيلم الفرح وكباريه تدخل الخلاط وتعمل "رمضان كريم".

38. إلى الآن، مفهمتش الفرق بين التصنيف العمري لـ12 سنة ولـ16 سنة.

39. دعاية مسلسل "شاش في قطن" إلى الآن على كوبري أكتوبر إنه "عيان في ميت".

40. كل نجوم رمضان تقريبًا نشروا على حساباتهم إن مسلسلهم هو الأعلى مشاهدة في رمضان.. محمد إمام نموذجًا.

مصراوي| تابعونا في صفحة متخصصة تواكب شهر رمضان بتغطية خاصة