"ريد بل" سر الكينج |منير: "أغاني هذه الأيام فاضية.. وغنيت بعد وفاة أمي" (فيديو)

كتب- مصطفى حمزة:

في أول تعليق له على ما يحدث في ساحة الأغنية، وصف الفنان محمد منير ما يقدم بأنه "أغاني فاضية من جوة مفيهاش جديد"، مؤكدا أن حالة الهبوط، التي تشهدها الساحة تشبه تلك التي مرت بها مصر عام 1918.

وتابع منير، في الحوار الذي أجراه معه الكاتب الصحفي عمر طاهر ضمن حلقات "ريد بل سر الكينج": "النهاردة أنا باسمع أغني فاضية من جوه، ومفيهاش حاجة، ربنا بحكمته في مصر بالذات، كل قرن من الزمن تحصل حالة من الإفلاس والهبوط الفني".

وأضاف: "أكيد الغناء الذي قدم عام 1918، شكل بتاع النهاردة، لكن ربنا عمره ما ساب مصر".

وتابع منير في حواره "ريد بل سر الكينج": "مفيش حد مابيحبش الغنا، اللي بيبيع لنا برتقال في الشارع بيحب الغنا، المهندس بيحب الغنا، تخيل أنا يوم وفاة أمي الله يرحمها نسيت نفسي ومن الصبح مشغول فدخلت الحمام فلقيت نفسي بحب الغنا، بغني، معرفش غنيت أيه، بس تداركت في لحظة إن أنا في حالة حزن، فتوقفت عن الغنا".

وأكد منير: "ما أجمل أن تختار مهنة هي فيها الإنسان كله، الإنسان لا يعشق غير الفرحة، والفرحة مبتجيش إلا بالغنا"، مضيفا في "ريد بل سر الكينج": "الحمد لله أنا واحد من الفنانين اللي قدروا يوصلوا حنجرتهم لأي جنسية عربية، وده شيء في حد ذاته بيخليني فخور، والفخر ده جاي من لغتي العربية، إن أنا قدرت أحشدهم ويؤمنوا بي وبرسالتي وبآرائي وبأفكاري عشان أحشدهم لشيء واحد، للسعادة ".

وعن تأثير الحزن على أغانيه، قال منير: "أحيانا الحزن بيهرّبني من النجاح، ومن الغنا، لكن حتى الحزن الحل الوحيد ليه هو إنك تغني، وأنا إديت لك مثل لأمي وهي ميتة من 4 ساعات، مكنتش أملك سلاح غير إن أنا أغني".

وأكمل: "أنا مبعرفش أغني أغنية أنا مش مؤمن بيها، فكل الأغاني اللي أنا غنيتها يا غنيتها لنفسي يا غنيتها للآخرين، الآخرين عشان أصعد بيهم، عشان أنهض بيهم، الشيء الوحيد اللي هينهض بينا وينهض نهضة حقيقية هو إن إحنا نغني".

وفي إجابته على سؤال عمر طاهر عن عدم لجوئه لفكرة النيولوك بالمظهر، قال منير لـ"ريد بل سر الكينج": "عدة الشغل الشائعة حاليًا بين الفنانين، مثل النيولوك والفوتوسيشن"، مضيفا: "كل ده ملحوق، وتقدر تحصل عليه، هل أقول لك إن أنا العربي الوحيد الحاصل على 3 أسطوانات بلاتينية، واحدة دهب، معتقدش إن حد على أرض العالم العربي حصل عليها، أنا بشتغل على رؤية الإنسان، وماذا يحتاج، ما مشاكله، ما مشاكل حبه، إيه اللي هو طالبه، فأنا بشتغل على ده ".