"مش عارفه حاطاه في دماغك ليه متجبيش سيرته تاني".. ابنة حسن أبو السعود ترد على شيرين (تسجيل صوتي)

كتب- وائل توفيق:

ردت ابنة الموسيقار الراحل حسن أبو السعود على الفنانة شيرين عبد الوهاب إثر تصريحاتها التي أدلت بها في مداخلتها الهاتفية لبرنامج" كلمة أخيرة" على شاشة قناة "أون".

وقالت رشا حسن أبو السعود في تسجيل صوتي لـ "et بالعربي": "أول حاجة أنا كتبت البوست، طبعا الأسرة كلها مستاءة، وأي حد بيحبه وبيحب فنه أكيد مستاء، وفي آلاف التعليقات على السوشيال بتدافع عنه وبتترحم، البديهي اللي إحنا تربينا عليه، نذكر محاسن موتانا، مش البديهي إن إحنا نتريق على حد توفى".

وتابعت: "بني آدم كان مريض وتوفى عنده 57 سنة، عشان كان مريض، وآه كان تخين ماشي أوكيه، بس حضرتك ممكن تشبهي ده بأي حد كان في عيلتك ممكن يكون تخين، مفيش داعي أبدا إنك تجيبي سيرة عليتي أنا، متجبيش سيرة والدي أنا، الخلاف اللي بينكم زمان كان مهني، والمفروض إنه خلص، والراجل مات، خلاص حضرتك، شيليه من دماغك".

وأضافت: "هي كل فترة لازم تخبط فيه بشكل مباشر وغير مباشر، أنا مش فاهمه حاطاه في دماغها ليه كل ده؟، متوفي من زمان جدا، والديلوجن بتاع إن إحنا نجرح الناس، وعادي إتس أوكيه، إن الناس نقول عليهم أي حاجة، أصلنا فنانين، لأ الكلام ده يعني للأسف الناس اللي بيشجعوها وبيعذروها طول الوقت، هما اللي مخلينها متمادية كده، وأحب أعرفكم إن كلمة عفوية انتحرت خلاص، هي مش هتقدر تبقى في السياق اللي بيحصل ده".

واستكملت: "شوهتولي معنى كلمة عفوية من كتر ما كل ما نقول حاجة وحشة، لأ، معلش أصلها عفوية، لأ، مش مسموح ومش مقبول، ومش هسمح أن حد يجيب سيرة والدي تاني، عيب، عيب جدا، هو أنامحتاجة أقول عيب؟ ده بديهي يا جماعة، بديهي أنه عيب".

واختتمت: "لو سمحتِ متجبيش سيرته تاني، ولا هي ولا غيرها، اللي عنده كلمة كويسة يقولها، اللي معندوش كلمة كويسة ومش قادر يترحم على واحد توفى، يبقى يلتزم فن الصمت، نسكت خالص".

قالت الفنانة شيرين عبد الوهاب في مداخلة هاتفية مع برنامج "كلمة أخيرة" مع الإعلامية لميس الحديدي: "أنا كنت زي البدر، ولما اتجوزت حسام حبيب بقيت زي حسن أبوالسعود".