ميار الببلاوي: "جالي هلع لما شفت شيرين.. واللي بيدخل حياة الفنانين بيبقى طمعان" (خاص)

كتب- وائل توفيق:

قالت الفنانة المعتزلة والإعلامية ميار الببلاوي، إنها وجهت رسالتها للفنانة شيرين عبد الوهاب، بعدما شاهدت صورها أثناء حفل تكريم وظهرت بوزن زائد.

وتابعت "الببلاوي" في حديثها لـ"مصراوي": "أول ما شفتها جالي هلع، لإن كنت من فترة شفت بطنها فقولت ده حمل، فقالوا لا مش صحيح، لما لقيتها مش حامل وبالمنظر ده قلبي صعب عليا جدًا، لإن شيرين يعني حد أيقونة فن مصرية".

وأضافت: "أنا من الناس اللي أعرف إن الناس وصلت للإسكتريم بتاعها امتى؟ وصلت للذروة النفسية بتاعتها امتى؟ فأكيد أنا مش زي ما في ناس سيبالي كومنت بيقولولي ليه منصحتهاش بينك وبينها، أنا معرفهاش شخصيا، واللي يقولي الوسط الفني أنتوا بتقابلوا بعض وتكلموا بعض، لو أعرف أصولها مكنتش كتبت البوست أصلا، لكن مش كاتباه لشيرين بالذات، شيرين كحالة، وأنا بقول لأي واحدة في مكانها، إن كل ده هيعدي، لكن لو بيعدي كسر زيادة معاه، هتبقى خسرت معاه من كل النواحي".

واستكملت: "إحنا كفنانين اللي بيدخل حياتنا بيبقى طمعان قوي، أنا ما أقصدش حسام حبيب ولا غيره، لكن أنا بقول بشكل عام، كله طمعان، يعني حتى في حاجة عيالنا باصينلها، بيكون داخل إنه هيقعد على تل فلوس، لكن لما يدخل ويلاقي المصاريف أكتر من اللي جاي، بعد شبورة الحب بياخد بعضه ويمشي، فهي لما لقيت حد يحتويها ويحب بناتها، لكن لما يحصل ده، هي مكسوفة من اختيارها، ده وجه الشبه بيني وبينها، أنا اتوجعت واتطلقت، ليا أربع تجارب، كل مرة بتوجع، لكن مفيش حاجة في الدنيا تجبر واحدة تعيش مع واحد غصب عنها".

يذكر أن الفنانة ميار الببلاوي وجهت رسالة للفنانة شيرين عبد الوهاب، بعد ظهورها بوزن زائد أثناء تكريمها في جامعة مصر للعلوم والتكنولوجيا، منذ أيام.

ونشرت ميار مقطع فيديو، عبر حسابها الخاص بموقع "فيسبوك"، قالت فيه: "أنا بصراحة شوفت الفنانة الكبيرة شيرين عبد الوهاب وهي بتتكرم من مهرجان ما، وشوفت الفستان اللي هي لابساه، شوفت الوزن اللي هي وصلت ليه، وشوفت شعرها، أنا مش عارفه في ايه، شيرين فوقي لنفسك، ولأولادك، الدنيا ما بتقفش على أي راجل في العالم".

وأضافت: "اسأليني أنا كلنا أتصدمنا، كلنا اطلقنا، كلنا فشلنا، وكلنا كان عندنا مسؤولية، كلنا حبينا، وكلنا اتسابنا، لكن يا حبيبتي، أنتي مش ملك نفسك، أنتي ملك جمهورك، بالفن اللي بتقدميه، وقبل جمهورك أنتي مثل أعلى لبناتك، أنتي عايزة تبعتيلي رسالة إنك إدمرتي، ما ينفعش تبعتيله رسالة إنك زهدتي في الدنيا".

وتابعت: "أنا بحبك قوي، وكان عندي ولد وأتعرضت لنفس الموقف دا، اتطلقت وكنت لوحدي وكنت متعلقة جدا بالشخص اللي اتطلقت منه، لكن بعدها الدنيا مشيت واتجوزت أكتر من مرة، عارفة إن حبك كان جامد أوي والعلاقة كانت حلوة، حبيبتي قومي وأقفي واثبتي وجودك، البسي أحلى حاجة، وارجعي ظبطي وزنك، أنا أتخضيت لما شوفتك طالعة بالطريقة دي، شيرين أرجوكي بناتك كدا هيتعقدوا، يا أما لما يعرفوا واحد هيبقوا عبيد تحت رجليه، يا إما مش هيدخلوا في أي علاقة".

وأكملت: "احنا مستنينك، شيرين اللي بنحبها، شيرين اللي بتفرز فن، الجدعة، المصرية الاصيلة، اللي بتاخد الخبطة وتقف تاني بميت راجل، أنا ما عرفش ليه بقولك كدا، يمكن أنا حاسة بوجعك أوي، لأنه عدى عليا أكتر من مرة، لكن الدنيا ما بتقفش على حد، وبصتك في بناتك بالدنيا".

يذكر أن آخر أغاني شيرين عبدالوهاب "وبحلفلك" في ديسمبر الماضي، من كلمات محمد مصطفى ملك، ألحان محمود أنور، وتوزيع وميكس وماستر محمد مجدي، كما طرحت في رمضان 2022 أغنية دعائية بعنوان "يا معافر"