كلامه يفيض "جليطة ومزايدة"...عمر طاهر ينتقد هجوم إسلام إبراهيم على والد المطرب النقاش

كتب- مصطفى حمزة:

انتقد الكاتب عمرطاهر، قيام الفنان إسلام إبراهيم، بالهجوم على والد الفنان الشاب أحمد سالم الذي اشتهر إعلاميا باسم "النقاش الموهوب".

"عمر" عبر صفحته في موقع فيسبوك، كتب: "ممثل معروف بيلوم على أبو النقاش أبو صوت حلو إنه حرمه يشوف حاله، علشان شيله هم جواز إخواته البنات، وخلاه يشتغل في النقاشة، وبوست الناس عماله تهلل له عن استعباد الأبناء وإنهم مش عبيد".

وتابع: "كلامه على قد وجهة نظره لكن المستفز احتفال البعض بيه، كلامه اللي من وسع ويفيض جليطة ومزايدة على الناس، وزغزغة للأفكار اللي بتشوش بعناوين ضخمة و بتلمع".

وأضاف عمر طاهر: "يعني واحد تخلى عن حلمه علشان يشيل أهله، ده شخص تحتفي بيه وباللي رباه، واحد ممشيش ورا الفرصة في بلد الفرص فيها ملبوسة، ومالهاش طريق واحد، وناس بتضيع عمرها وحياتها وراها ع الفاضي، ومشي ورا مسئوليته اللي انفرضت عليه و ماهربش قوم إيه؟، قوم يصحى في يوم يلاقي ربنا مجازيه عن اللي عمله، ومخلي مصر كلها تحت رجليه و بتجري وراه".

عمر اختتم حديثه قائلا: "اللي شقى في حاجة تنفع أصغر عيل في ناسه يتقال له احنا فرحانين بيك، وبناسك ونشيلك على راسنا، إنت عملت حاجة كبيرة، وما تندمش على تعب ووقت ضاعوا وأحلام أجلتها علشان مافيش حاجة بتروح ع الفاضي، كله في الحصالة".

كان الفنان إسلام إبراهيم، نشر صورة للشاب أحمد وشقيقه، عبر حسابه بموقع "فيسبوك"، وعلق قائلا: "أنا عارف إن الكلام اللي هقوله ده ممكن ميعجبش ناس كتير بس أنا شايف الترند ده من زاوية تانية خالص، فكرة إنك ربنا يرزقك بشابين زي دول ينطبق عليهم كلمة شباب زي الورد لأنهم ربنا كرمهم بالوسامة والموهبة والصوت الحلو وعندهم المؤهلات إنهم يكونوا نجوم ومتحاولش تساعدهم إنهم يحققوا حلمهم أو يعملوا الحاجة اللي بيحبوها وتفرض عليهم قيود ومسؤوليات مش بتاعتهم".

وتابع: "زي إن هما يجهزوا إخواتهم البنات اللي أكبر منهم حضرتك البنات دول إنت اللي خلفتهم مش هما والحياة دي حياتك إنت مش حياتهم هما وتفرض عليهم يكونوا نقاشين وده مش تقليلا من مهنة النقاش أكيد هي مهنة محترمة وشريفة لكن أي حد مش موهوب يقدر يشتغلها لكن مش أي حد عنده الموهبة والصوت ده".

وأضاف: "خلاصة الكلام إحنا مش بنخلف العيال عشان نستعبدهم احنا عندنا مفاهيم مغلوطة كتير في فلسفة الجواز والخلفة والتربية وزي ما طاعة الوالدين واجبة وأي ابن بيفتح بقه أو يعترض على حاجة مش عجباه بيبقي ابن عاق كمان الولاد أمانة هتتسأل عليها قدام ربنا".

"أحمد" الذي أطلق عليه مؤخرا المطرب النقاش، لاقى إعجاب الكثيرين من نجوم الفن، ومن بينهم رامي جمال الذي تواصل معه بالفعل ووعده بتقديم أغنية له.