انتصار:"نفسي أشوف فيلم فيه مايوه ومقولتش معنديش مانع إن بنتي تتباس في عمل فني"

كتب- مصراوي:

كشفت الفنانة انتصار، حقيقة عدم امتناعها تقديم ابنتها شاهيستا لمشاهد قبلات في الأعمال الفنية، مؤكدة أنها لا تفهم معنى مصطلح "سينما نظيفة".

وقالت انتصار، في تصريحات تليفزيونية ببرنامج "سبوت لايت": "مش فاهمة جملة السينما النظيفة.. دي صحفي طلعها من غير ما يقصد، مفيش الكلمة دي وترجمتها مش موجودة وأتمنى أننا نبطل نرددها، في جمل ملهاش ترجمة في القاموس، لكن معدين البرامج بيستخدموها لأنها مادة ثرية وكلام كبير وهيعمل تريند، مع أن في موضوعات أهم ممكن نتكلم فيها، بدل النظيفة والمايوه، هو في مايوهات أنا نفسي أشوف فيلم فيه مايوه حتى لو رجالي، قعدنا نقول كلام بدأت الناس تتأثر بيه مفيش فيلم صيفي فيه بحر زي أفلام زمان في السبعينيات والستينيات.

وعن تصريحها بأنها لا تمانع أن ابنتها يكون لديها مشاهد قبلات في الأعمال الفنية، ردت انتصار: "أنا مقولتش اني معنديش مانع ان بنتي تتباس في عمل فني، ده كان سؤال وليه إجابة طويلة واختصروها وكتبوها كده وفكرت أرفع قضية بس مكنش عندي وقت".

وتابعت انتصار، أن شخصيتها في مسلسل ذات وفيلم واحد /صفر أرهقتها كثيرا: "بقيت أروح البيت تعبانة ومنهكة وعصبية بسبب دوري في ذات، الست الكبيرة تعبلي وشي أوي لاني كنت بحط 3 ساعات مكياج على الوش عشان وشي يكرمش، وبيبقى حمل تقيل عليا اني أقعد عايشة في الشخصية اللي عندها 80 سنة طول النهار، ولما بروح البيت ببقى عصبية".

وأضافت: "فيلم واحد/ صفر تعبني جدا برضه ورغم كده خدت عليه جوائز كتير، وأكتر دور كوميدي كنت مبسوطة منه، وأنا بعمله كان دوري في فيلم أهواك مع تامر حسني، وغادة عادل كوميديانا مستجيبة".