بعد تكريم اسم محمود عبدالعزيز.. نجله: أبويا مشرفنا في حضوره وغيابه

كتب- مصراوي:

تحدث الفنان محمد محمود عبدالعزيز عن تكريم اسم والده الفنان الراحل محمود عبدالعزيز في المؤتمر الوطني للشباب في الإسكندرية، إذ تسلم تكريمه من الرئيس عبدالفتاح السيسي.

وقال خلال فيديو نشره على صفحته بموقع التواصل الاجتماعي "انستجرام": "هبدأ كلامي بكلمة بدأ بيها الرئيس، وهي إن اللي ربنا معاه عمره ما ينضام.. أنا عمري في حياتي ما حضرت أي حاجة ليها علاقة بمؤتمرات الشباب ولا كنت بتابعها وندمان لإني شفت شباب زي الورد ما شاء الله وكلهم مصدقين وحابين اللي بيعملوه".

واستكمل: "الجديد بقى بالنسبالي إني كنت على بعد كام متر من رئيس جمهورية بلدي ده في حد ذاته جديد عليا بصراحة، حسيت إن الريس زينا جدا وحاسس بينا جدا، بيتكلم من قلبه زينا جدا.. هو مبينكرش إن إحنا عندنا مشكلة بل بالعكس قال وقال إن هو شغال عليها وده في حد ذاته حاجة تطمن جدا وبسطتني جدا بصراحة".

وعن تكريم والده قال: "نيجي بقى لموضوع تكريم أبويا لأن ده موضوع كبير بالنسبالي جدا .. أبويا ده مشرفنا في حضوره وغيابه ومخلينا نتباهى بيه واسمه موجود ومنور في حضوره وغيابه برده، بس المرة دي الموضوع مختلف شويتين تلاتة لأن اسم أبويا بيتكرم من مصر ومن رئيس الجمهورية ومصر دي ربنا يعلم أبويا كان بيتكلم عنها إزاي في كل حتة يروحها".

واختتم حديثه قائلا: "أبويا كان بيبكي وقت الإنفلات الأمني ويقول حسبي الله ونعم الوكيل وقام مسح عياطه وقال لا مصر مش هتقع مصر هتقوم وهترجع أحسن من الأول.. وده تكريم ليا ولأخويا ولولادنا وولاد ولادنا".

كان الرئيس عبدالفتاح السيسي كرم اسم الفنان الكبير الراحل محمود عبدالعزيز خلال المؤتمر الوطني للشباب في الإسكندرية، وذلك على هامش تكريم نماذج مصرية ملهمة من محافظة الإسكندرية.

وتسلم الفنان والمنتج محمد محمود عبدالعزيز نجل الفنان محمود عبدالعزيز، تكريم والده من الرئيس السيسي، وسط حضور عدد كبير من الشخصيات العامة.

يذكر أن الفنان الكبير محمود عبدالعزيز، توفي في مستشفى الصفا بالمهندسين بعد وعكة صحية، ودُفن في مدافن العائلة بمسقط رأسه بالإسكندرية.