هنا الزاهد تتأثر بحديثها عن علاقتها بوالدها: "كان نفسي يكون قريب وناس كتير فاكراه مش موجود"

كتب- مروان الطيب:

كشفت الفنانة هنا الزاهد، عن علاقتها بعائلتها خلال حوارها مع الإعلامية إسعاد يونس في برنامج "صاحبة السعادة" على قناة "dmc".

وعن والدها قالت: "هو موجود وناس كتير فاكرة إنه مش موجود، كتير أوي بيسألوني السؤال ده وكان موجود في فرحي لكن هو مش قريب خالص بصراحة، وكان نفسي يكون قريب وسبب من أسباب إني كنت بخاف أوي ومش عايزة أغلط وأنا صغيرة أني أخاف لما يجيلي استدعاء ولي أمر من المدرسة ماما اللي تيجي كنت ببقى عاوزاه هو اللي ييجي".

وأضافت: "وكانت دايمًا الحته دي مش موجودة، وكنت في فرح مرة وشوفت صلاح عبدالله وكانت بنته بتتجوز ولما كنت واقفة شوفته وهو بيعيط بحرقة عليها انها بتتجوز ومبسوط بيها ورحت وقفت على جمب وبكيت جامد وكانت أول مرة أبكي في فرح قولت إحساس عمري ما حسيته وكان نفسي أحسه، وبحاول من وقت للتاني أعبر له عن الإحساس ده وهو إنسان كويس جدًا بس هو عنده عيله تانية وربنا يخليهم له برضه، وربنا يخليهولي هو في الاخر أبويا، بس افتقدت أبويا مشاعر الأب، عشان كده بخاف من فكرة الجواز بخاف يفشل تاني".

اقرأ أيضا:

هنا الزاهد عن الراحل طلعت زكريا وعلاقته بابنته: "كنت بغير منها وبقول يا بختها"

هنا الزاهد تتحدث عن طليقها أحمد فهمي: "منزلتش دمعة واحدة"