الحياة الزوجية بين العند والمرونة ...ليه لازم أتغير؟

كتبت: سارة سليمان
Meta coach و مدربة علاقات زوجية معتمدة

"A good marriage is one which allows for change and growth in the individuals and in the way they express their love." - Pearl S. Buck

من الآخر ترجمة الكلام ده في كلمة واحدة بس هي: المرونة!!
أيوة طبيعي إن أي اتنين متجوزين لما بييجوا يقرروا إنهم يرتبطوا بيدوروا الأول على الحاجات اللي بتجمعهم: زي إنهم يكون لهم هوايات متقاربة, أحلام شبيهة ببعض, أذواق متقاربة, و هكذا. لكن الطبيعي كمان إنهم حيلاقوا إن في حاجات تانية كتير مش حتكون متشابهة ولا حتى متقاربة!! شئ طبيعي, لأن مفيش حد نسخة من حد، كل ده جميل, لكن اللي مش طبيعي خالص وغير مقبول إني أستعجب وأستنكر إن في حاجات في زوجي طلعت غير ما أنا كنت متخيلة!!! (ده على أساس إني اكتشفت ده بأه بعد الجواز).
هممم, طب إيه؟ جوزك مختلف عنك في بعض الحاجات, فين المشكلة؟؟ طيب مانستغل الاختلاف ده ونحاول نكمل بيه بعض؟؟ ماهو طالما اشتكيتي أو اشتكيت إنه اختلاف يبقى هي حاجة مش موجودة عندك! يبقى هي حاجة ممكن نحاول نكمل بيها نقص عندنا!! أو يمكن نحاول نتكلم في ازاي نقننها أو نعدلها أو نتعامل معاها، المهم إن في كذا طريقة للتعامل مع الاختلاف. لكن المهم هو زي ماقلت: المرونة في التعامل, المرونة والتقبل, لأن في الحقيقة المشكلة مش بتكون أغلب الوقت في الاختلاف اللي أنا اكتشفته ولا اللي فجأة مش عاجبني, هي المشكلة الحقيقية وخلينا نكون صرحاء: العند! أيوة العند .. كتير مننا بيعتبر إن أنا لما أتقبل حاجة مش عاجباني أو إني أنا لما أضطر أتغير فده حيكون بمثابة استسلام، كتير جدا جدا من الرجالة, و كمان الستات الصراحة, بيعتبر إن أنا كده و طريقتي كده واللي عاجبه عاجبه واللي مش عاجبه الباب يفوت جمل!!! صح ولا أنا باقول كلام خيالي؟ دلوقتي لما الزوجة تكون متعودة عند أهلها إنها لما بتخرج مش بتقول لحد هي رايحة فين ولا بتعمل إيه ولما اتجوزت لقت جوزها كل مرة يسألها أنتي مع مين ولا فين (راجل حشري أوي الحقيقة) وبيطلب منها كمان قبل ماتخرج تقوله إنها خارجة (لأ ده كده مزودها خالص). لكن هي مش كده و ماتربتش على كده ومش كل مرة بقى أتكلم و آخد منه الإذن!! طيب لو تساءلنا هنا للحظة: العند حيجيبلك إيه والمرونة حتجيبلك إيه ونوزنها كده, تفتكروا أي الحلين حيكون أوقع وأفيد عشان الحياة تستمر؟؟
ونفس الموضوع طبعا يمكن تطبيقه على الرجال: فيها إييييه لو وطيت و رفعت الشراباااات من على الأرض؟؟؟ فيها إيه فهمني؟؟ ماتخلي الناس تعيش يا أخي و تفضها سيرة بأه؟؟
يا ربي, العند ده شئ كده كارثي, حاجة كده موجودة في الجواز بسسسس عشان تدمره، بجد فعلا زي ما المقولة بتقول: الجواز السليم الصحي فعلا هو اللي بيسمح فيه بالتغيير مش بس في الأشخاص, لكن كمان في أساليبهم في تعبيرهم عن حبهم لبعض وفي معاملتهم لبعض ، عادي إننا نتغير لبعض, طالما ده أفيد لحياتنا وأصح لعلاقتنا، مش عيب إنك تعرف مراتك ايه اللي هايريحها ومش موجود فيك فتغيره عشانها, لكن العيب كل العيب إنك تعند و تتكبر لأنك شايف إن أنا كده وهو كده و خلاص، دي طفولة على فكرة مش رجولة! يا أخي ده ناطحات السحاب في اليابان بمرونتها بتصمد أمام الزلزال ال 8.9 من غير ماتنهار و تفضل ثابتة مكانها، مش عارف إنت تكون مرن وتستحمل التغيير ولو كان فيه اضطراب؟؟ إنتي كمان نفس الحكاية, إنزلي شوية وبلاش البرج العالي اللي أنتي عايشة فيه ده, البرج ده كان في القصص, والبرنس راح بالحصان الأبيض وأخدها وخلصنا, وعاشت معاه واتبسطت واكتشفت إنها نزلت من البرج عشان تمسح وتغسل وتربي. فوقي بأه, الحياة القديمة دي انتهت والواقع بيفرض علينا حاجات مختلفة وعادات مختلفة!
لما اتجوزنا خلاص أصبحنا اتنين مش واحد عايش لوحده، اتنين بيشاركوا بعض الحياة, خلوا الحياة تمشي و اسمحوا للأيام تعدي وأكيد المرونة والتساهل في الأمور هو الحل, مش أبدا العند والوقوف على صغائر الأمور!