شرح طريقة التقييم الجديدة.. وزير التعليم ينشر رسالة مدرس رياضيات

كتب - أحمد جمعة:

نشر الدكتور طارق شوقي، وزير التربية والتعليم، مساء الأربعاء، رسالة من محمد منير، مدرس بمدارس المتفوقين في العلوم والتكنولوجيا STEM، يشرح خلالها طريقة التقييم الجديدة.

وقال وزير التعليم عبر حسابه على "فيسبوك": "كما ترون فإن مصر زاخرة بطلاب نابهين مثل الآلاف الذين حققوا نتائج ممتازة بعد ٨ شهور فقط من انتقالهم للنظام الجديد، وزاخرة أيضا بمعلمين أصحاب علم ورسالة معاً".

وقال المعلم في رسالته: "نتيجة الصف الثاني الثانوي محدش فاهمها خالص، وبما إني مدرس رياضيات لازم يكون لي دور واضح في تفسير النتائج دي".

وأضاف: "تعالى نبدأ ونعرف يعني إيه درجات التقييم الجديد اللي محدش فاهمها، ببساطة لو أنت جبت في الكيمياء 90 من 100 وفي الرياضيات 80 من 100، أنت كده أشطر في أي مادة منهما؟!.. الفهم الخاطئ والسائد عند الجميع هيقول أنت أشطر في الكيمياء.. لكن الكلام ده مش صحيح دائما، لأن ممكن تكون جايب في الرياضيات 80 من 100 وأنت الأول على المدرسة في الرياضيات؛ لأن الامتحان كان صعبا أو طويلا والوقت كان غير كافٍ، وفي المقابل إن أنت كنت الأخير على المدرسة في الكيمياء؛ لأن امتحان الكيمياء كان من الكتاب بالنص وكان سهلاً جدًا فكل الطلاب قفلوا الامتحان".

وتابع: "هنا أنت أشطر في الرياضيات؛ لأنك الأول على الدفعة رغم إنك جايب 80 من 100 فقط.. من جهة أخرى عندك التنسيق بيعتمد على درجتك أم بيعتمد على ترتيبك؟!.. الوزارة بتريح الطالب وتعطي له الدرجات في المادة لكن التنسيق بيعتمد على ترتيبك مش على درجتك، مثلا لو الأول على الجمهورية جايب 80%، فكلية طب هتاخذ من 80%".

وواصل المعلم: "علشان كده، لو عايز تعرف درجتك الحقيقية لازم تعرف ترتيبك مش درجتك، في الإحصاء فيه مفهوم اسمه Percentile ده عبارة عن نسبة مئوية من 100 تعطي درجة ترتيب، مثال لو هناك 1000 طالب وأنت الأول هتكون درجتك 100، لو كنت العاشر هتكون جايب 99، ولو كان ترتيب الـ400 هتكون جايب 60... ولو كان ترتيبك الـ700 هتكون جايب 30 ولو كنت الآخير هتكون جايب صفر... ده مش معناه إن إنت ناجح أو راسب، ممكن تكون الأخير وإنت درجتك في المادة 95 من 100".

وأوضح أن النظام الجديد لا يجدي معه استخدام طريقة الدرجات القديمة؛ لأن الامتحان به أفكار، و"مش كل الطلاب هيقفلوا الامتحان زي زمان، علشان كده أنا شخصيا فخور جدًا، إن فيه حد فاهم إحصاء بيعطي للطلاب نتيجة حقيقية لهم".

وتساءل مدرس الرياضيات: "هل نظام الترتيب ده اختراع مصري مثلا؟!... للأسف لا!.. ده فيه امتحانات دولية كثيرة تتبع الترتيب من الدرجات زي مثلا امتحان GRE، وده امتحان بيعادل بكالوريوس في الفيزياء أو الرياضيات.. المهم تدخل الامتحان تدعي وتقول "يا رب غيري ميعرفش يحل"، مع إن العادي إن إنت تدعي وتقول "يا رب أعرف أحل"؛ لأن الامتحان بيعتمد على الترتيب، مش مهم تجيب كام أهم حاجة ترتيبك الكام".

وأضاف: "ناس بتسأل إنها ترتبها قل أو زاد فعلا ممكن ده يحصل؛ لأننا اتفقنا إنها مش درجة.. لو مثلا واحد عمل تظلم وزاد درجتين مثلا، فكده الترتيب لباقي الطلاب هيتغير... ونرجع تاني نقول إن بنظام الدرجات القديمة لو كنت جايب 80 من 100 وعملت تظلم وبقيت 82 من 100 هيكون درجات باقي الطلاب زي ما هي لكن إحنا بنتكلم على ترتيب".

وشرح المفهوم للنتيجة من ناحية الرياضيات: "أولا: نظام الألوان ده نظام زي نظام التقديرات تمامًا..

تخيل اللون الأزرق يعنى امتيازًا: (مثلا من 85% إلى 100%) واللون الأخضر جيد جدًا: (مثلا من 70% إلى 85%)، واللون الأصفر جيد: (مثلا من 50% إلى 70%)، واللون الأبيض ضعيف أو راسب أقل من 50٪ من درجة المادة.. وهأكد تاني إن الرقم تحت العمود (ارتفاع النقطة السوداء في العمود) ده مش درجتك في المادة ده ترتيبك يعني لو كانت النقطة السوداء في الأصفر والرقم تحت العمود ٣٧ مثلا فأنت كده ناجح لكن ترتيبك الـ٦٣ من ١٠٠ من الطلاب.

هتشوف النقطة السوداء موجودة في أنهي لون وتعرف تقديرك.. هي ده الدرجة بنظام القديم خلاص أنت كده عرفتها... طبعا ده مش اختراع مصري يعني... ده طريقة تقييم كل مدارس العالم.. بس الفرق إنهم بيعملوها حروف A,B,C,F.

ثانيا: كانت النتيجة المعلنة سابقا قبل ترتيبك بدون ما تعرف درجتك (قولنا ده مش الدرجة ده Percentile وبتدل على ترتيبك) ومعناها كل ما النقطة السوداء تكون أعلى كل ما يكون ترتيب مع الأوائل.. لو النقطة السوداء موجودة أعلى العمود تعرف إنك الأول على الجمهورية ولو موجودة في قاع العمود تعرف إنك أفشل طالب على مستوى الجمهورية... اتفقنا كل ما الرقم ده يزيد، أو ما يقابلها كل ما النقطة السوداء تكون أعلى كل ما تكون متفوقًا أكثر.

ثالثا: ايه المتوسط على الجمهورية ده، تخيل كده إننا جمعنا كل درجات الطلاب في المادة الواحدة وحسبنا لهم المتوسط مثلا كان 80 من 100، فالمتوسط ده بيسمى متوسط حسابي، وهو قيمة إحصائية مهمة جدا علشان تعرف مستواك.. لو المتوسط ده كان مثلا 80 من 100 فده هياخذ لون أخضر، وله ترتيب Percentile مثلا 60 زي اللغة العربية فلو أنت كطالب فوق المتوسط هتبقى طالب متميز أو لو أنت عند المتوسط هتكون طالب عادي، أو لو أقل من المتوسط يبقى أنت طالب محتاج تحسن نفسك".

واختتم رسالته قائلا: "حاجة مهمة في الإحصاء اسمها الوسيط، الطالب قاعد يدرس فيها طول عمره وفي الحقيقة الوسيط ده يعادل ترتيب 50Percentile يعني الطالب اللي فوق الـ50 ده طالب في المتوسط، والطالب الأقل من 50 ده طالب تحت المتوسط، أو بطريقة أخرى لو النقطة السوداء فوق منتصف العمود هيكون مستواك فوق المتوسط، ولو أسفل منتصف العمود هيكون مستواك تحت المتوسط".