"ماشي بشهادة وفاتي".. متوفي على قيد الحياة: "أنا ميت على الورق من 3 سنين"
كتب- محمد أبوالمجد:
تناول الإعلامي "شريف عامر" في برنامجه مشكلة صدور قيد وفاة لأحد المواطنين، بالرغم من أنه مازال على قيد الحياة.
وقال "طه الإمام الشافعي" في حواره لبرنامج "يحدث في مصر" على فضائية "إم بي سي مصر" اليوم الأربعاء، إنه صدر له شهادة وفاة باسمه منذ 3 سنوات في 20 فبراير عام 2019، وأنا عندي 62 سنة، مشيرًا إلى أنه اكتشفت خبر وفاته عند توقف بطاقة التموين الخاصة به في شهر مارس 2019، قائلًا: "قالولي سقطت من على الكمبيوتر ومش هينفع تاخد تموين تاني، ولما روحت انتخابات مجلس النواب، عشان أشوف اللجنة الانتخابية بتاعتي فين في 2020 قالولي صاحب الرقم القومي متوفي".
وأضاف "طه": "أنا تابع سجل المدني بالمنزلة في محافظة الدقهلية، وعملي بحث عشان أتاكد ولقيت نفسي ميت وقالولي صاحب البطاقة اتوفى واتدفن في بورسعيد من 3 سنين"، موضحًا: "جميع حقوقي واقفة تموين وتطعيم كورونا واقف لأني قدام الناس متوفي، وماشي ببطاقة هتنتهي الشهر الجاي وماشي بشهادة وبلاغ وفاتي".
وأكد: "طلعت بلاغ وفاة عشان أصلح الغلط وجابولي بلاغ الوفاة ومرفق فيه صورة البطاقة بتاعتي منين منعرفش، حد عامل بلاغ وفاة بنفس صورة بطاقتي في محضر رسمي بمحكمة بورسعيد، وأنا مليش علاقة ببورسعيد ولا أي معارف فيها، وبطاقتي مذكور في المحضر أن بطاقتي كانت مع الشخص دا لتخليص مشكلة ميراث لديه وهو الوحيد اللي أخد صورة بطاقتي".
وأردف: "ماشي بكل الأوراق ومش عارف أعمل إعادة قيد أو بطاقة أو أطعم بكورونا أو أي شيء، وجميع المصالح الحكومية معترفة بشهادة الوفاة ومش معترفة بيا وأنا عايش، وبجري حاليًا على إعادة القيد لأني لو اتوفيت دلوقتي هتدفن ازاي؟!".
وناشد "طه"، المسؤولين بمساعدته في عمل إعادة قيد وإزالة أوراق وفاته، قائلًا: "بقالي 16 شهر بجري عشان أعمل إعادة قيد وبطاقة شخصية أمشي بيها، روحت المنزلة والأحوال المدنية في العباسية وبعد شهرين قالولي مشكلتك في بورسعيد مش عندنا، وروحت لوزارة الصحة في بورسعيد حلفولي إنهم مش هيعملوا إعادة قيد إلا بجواب من المحكمة، ومعرفش ايه دخل المحكمة بإعادة قيد".
فيديو قد يعجبك:
