"فخورين بيه للأبد".. ابنه عبدالسلام محجوب: "عرفنا من الدراما أنه الريس زكريا"

كتب- محمد أبوالمجد:

قالت إيمان عبدالسلام المحجوب: "الحمدلله أنا فخورة بوالدي وطول عمري فخوره بيه والنهاردة فخورة بيه أكثر، عشان هو أدى رسالته فعلا وهو إنسان جميل وإنسان متواضع وطيب وحنون وأب فوق المثالي وإنسان عمري ما شفته زعل حد أو ضايق حد ودائما عايز يريح الناس كلها ويعملنا كل حاجة ويدينا عنيه أب مثالي فعلا، وكلنا بنفتخر بيه وبنحبه وفخورين بيه".

وأضافت "إيمان" في مداخلة هاتفية لبرنامج "يحدث في مصر" على فضائية "إم بي سي مصر" اليوم الثلاثاء: "مكناش نعرف عن شغل والدي في جهاز المخابرات المصري، وكان بيسافر ويروح ويجي ومبنعرفش حاجة عن شغله غير إنه كان بيقولنا أنا بحب مصر وعشان كده سايبكم يا ولاد وبعمل حاجة ومش متواجد".

وتابعت، إن والدها كان يعتمد على والدتها في كل شيء يخص تربيتهم، قائلة: "لما كان بيبقى موجود مكنش بيسيبنا، ومقدرش أقول غير إنه كان بيعمل من قلبه وبيحب بلده فعلًا بجد من قلبه وخلانا كلنا نطلع نحب مصر حتى أحفاده"، مؤكدة: "عرفنا من الدراما أنه الريس زكريا في جمعة الشوان في مسلسل دموع في عيون وقحة، وعرفنا من صحابه مش منه كمان لأنه مش ممكن كان يحكي حاجة".

وأردفت، ابنه الراحل عبدالسلام المحجوب: "هو كان راجل كتوم جدًا ومستحيل يحكي حاجه عن شغله، وأب مثالي يقعد مع ولاده يتكلم في الحاجات العامة ولما كان بيسافر وبيجي منعرفش كان مسافر فين".

وأشارت إلى أن أحفاده كان لهم نصيب كبير من الحب لديه، وولاد أحفاده أيضًا، قائلة: "كلنا كنا بنقوله يا جدو لأنه كان أحلى لقب على قلبه، حتى في المستشفى وهو تعبان الأطباء والجميع كان بيقوله يا جدو"، مؤكدة: "كان قريب جدًا من ربنا ومتدين ومعتدل في كل أمور حياته ومجهتد جدًا ومكنش عنده مشكلة في حاجه أدى اللي عليه كله وراضي بكل اللي ربنا جايبه وكان بيقول اللي ربنا جايبه رضا من ربنا كانت أكتر كلمة يقولها، وكلنا فخورين بيه للأبد".