''أولتراس أهلاوي'' للداخلية : القصاص السبت وإلًّا ''هاتتمنوا تعرفوا تهربوا''

كتبت – راتان جميل:

وجهت رابطة ''أولتراس أهلاوي'' رسالة إلى وزارة الداخلية قائلةً: '' فاكرين جمعة الغضب اللي هربتوا فيها؟، يوم ٩ مارس لو مجاش القصاص منكم وقتها هتتمنوا تعرفوا تهربوا، بس وقتها هتشوفوا اللي مستحيل في يوم تتخيلوه''.

جاء ذلك في بيان الرابطة بخصوص تجمع أعضاءها لحضور جلسة الحكم في مذبحة ستاد بورسعيد، يوم السبت المقبل، قالت فيه: ''نتكلم في الأول عن جيكا ولا كريستي؟ نتكلم عن الجندي ولا الشافعي؟ ولا نبدأ الحكاية من الأول ونتكلم عن خالد سعيد وسيد بلال؟ كل دي مجرد أمثلة بسيطة لـ... كيان تحت أي نظام، بيستحقوا لقب (الداخلية بلطجية) بجدارة، بيمارسوا جرائمهم من قتل وسحل وتعذيب بكل (بجاحة) ودايما بيتم التستر على كل الجرائم دي مع اختلاف الأنظمة''.

وأضاف البيان: ''كيان شارك وتواطأ ودبَّر وغدر في المجزرة اللي استشهد فيها ٧٢ راجل، كيان عمره ما بيواجهني وش في وش، شاف إن أفضل وسيلة لمقاومة الرجال هي الغدر والخيانة يعنى زيهم زي الصهاينة مايفرقوش عنهم كتير''.

وتابعت الرابطة: ''كل اللي شوفتوه الأسبوع ده هو ولا حاجة، هو بجد ولا حاجة، فاكرين جمعة الغضب اللي هربتوا فيها؟، يوم ٩ مارس لو مجاش القصاص منكم وقتها هتتمنوا تعرفوا تهربوا، بس وقتها هتشوفوا اللي مستحيل في يوم تتخيلوه.
9 مارس هو الجلسة الثانية للنطق بالحكم، هي الجلسة الأهم واللي فيها العدد الأكبر، الحكم اللي كان يوم ٢٦ يناير هو فات وخلص، وأكيد مش إحنا اللي هيضحك علينا ونفرح ونقول القضية خلصت لما يتعدم ٢١ من اللي قتلوا''.

واختتمت الرابطة بيانها قائلةً: ''رسالة أخيرة: في الجلسة الأولى قولنا إن البعض ممكن يكون أخر يوم بالنسبة له يوم ٢٦ يناير، المرة دي (الكل) هيبقى نازل عامل حسابه إن ده أخر يوم له لو الحق مارجعش، يا نجيب حقهم يا نموت زيهم''.