لأول مرة.. 9 معلومات عن الشهيد أحمد المنسي ترويها زوجته

كتبت- عايدة رضوان:

ألقت منار محمد سليم، زوجة الشهيد البطل العقيد أركان حرب أحمد صابر منسي، كلمة خلال الندوة التثقيفية الـ 26 للقوات المسلحة بمناسبة الذكرى الـ 44 لانتصارات أكتوبر، بحضور الرئيس عبد الفتاح السيسي، اليوم الاثنين.

وبدأت منار، كلمتها، قائلةً:" أنا جاية النهاردة أتكلم عن أحمد منسي الإنسان مش البطل"، مضيفةً: "المؤسسة العسكرية اللي بينتمي ليها أحمد أولى بالحديث عن بطولاته".

وكشفت زوجة الشهيد عن معلومات لأول مرة عن البطل أحمد المنسي، وقالت: "أحمد كان بيقدم المساعدة لأي إنسان محتاج، لما كان بيلاقي سيدة معاها أطفال صغيرين كان بيوصلها لحد بيتها، ولما كانت بتدعيله كان بيرد عليها بإنه ماعلمش حاجة، كان دايمًا بيقول أنا ماعلمتش غير إني طلعت حق ربنا في العربية، كل حاجة في الدنيا ربنا مديهالي ليه فيها حق، اليوم اللي كان بياخد مرتبه فيه، كان بيروح يطلع حق ربنا فيه، واللي بيتبقى بنعيش بيه".

وأضافت: "ابني بعد استشهاد والده بثلاثة أيام قالي أنا نفسي لما أكبر أدخل الكلية الحربية عشان استشهد زي بابا"، وتابعت: "فكرة إهانة بلده ولو بإلقاء منديل في الشارع كان مؤلم بالنسبة له، كان بيحب مصر، كان بيغير على بلده".

وأردفت: "أحمد كان بيكتب شعر"، وروت بعض الأبيات له:" شجرة إنتي يا مصر من عمر التاريخ، أعلم أنكِ فانية، فلا شيء باقٍ، ولكنكِ باقية حتى يفنى التاريخ".

وعن علاقته بالأخوة الأقباط، قالت: "كان بيحب الأخوة الأقباط جدًا وبيحبوه، وحزن جدًا وبكى لما حصل تفجير في أحد الكنائس"، متابعةً: "أحمد بعد استشهاده اتصلى عليه في المساجد والكنايس".

وأضافت زوجة الشهيد أحمد المنسي: "أحمد ماكنش بيغرز في ابنه غير علاقته بربنا وحبه لجيش بلده، ومن كتر ما الولد كان فخور بمصر وبجيش مصر عمل له أفارول، وكان وعده إنه فيه أقرب مناسبة هياخده بالأفارول للشغل".

وأردفت: "قالي إنتي خايفة ليه أنا هبقى شهيد، أنا واثق إن ربنا هيخلي باله منكم بعدي، وواثق إني سايب بطلة هتربي الولاد أحسن ما أنا عاوز".

وقالت، إن" أحمد كان مجهز الأفارول اللي هيدفن بيه، والمقابر قبل ما يستشهد بشهر، وأوصى ألا يُغسل وألا يكفن، وأن يدفن بالملابس التي استشهد بها".

وأضاف، أن المنسي ترك، خطابًا للعدو، قال فيه: "جزيل الشكر لعدوي اللي أتاح ليا الفرصة بعد سنين من التدريبات إني أواجهه، دخلت أرض الفيروز بأفارولي، وخلاني أصلي في كل شبر فيها"، متابعًا: "أقسم بالله مالكش عيش فيها طول ما إحنا فيها".

يذكر أن الرئيس عبد الفتاح السيسي، استقبل صباح اليوم الاثنين، المنتخب الوطني الأول لكرة القدم وجهازهم الفني في قصر الاتحادية وذلك لتهنئتهم على التأهل لنهائيات كأس العالم المقرر إقامتها في روسيا 2018.

كما تفقد معرض منتجات أسر الشهداء بمركز المؤتمرات والمعارض الجديد بالتجمع الخامس، واستمع الرئيس لشرح من الدكتورة غادة والى وزيرة التضامن، حول معرض الشباب والأسر المنتجة.​