السيسي: إجراءات الإصلاح الاقتصادي هي الأصعب في تاريخ مصر الحديث

كتب- محمود مصطفى:

قال الرئيس عبد الفتاح السيسي، إن الشعب المصري استوعب الدرس جيدًا، وانتبه له بسرعة، و الدليل تحمله ما حدث من إجراءات الإصلاح الاقتصادي.

وأضاف السيسي- خلال كلمته في جلسة "ما بعد النزاعات والحروب.. آليات بناء المجتمعات"، باليوم الثاني لفعاليات منتدى شباب العالم، اليوم الأحد-: "المصريون انتبهوا للدرس بسرعة، واستوعبوه بجلاء، والله ما بجامل المصريين، بدليل إن إجراءات الإصلاح الاقتصادي كانت أقصى ما تم تنفيذه في تاريخ مصر الحديث، ولو المصريين ما كانوش استوعبوا وبقوا حريصين على بلدهم كانوا اتحركوا، وكانوا بيتحركوا على أقل من كده بكتير جدا علشان يغيروا".

وتابع السيسي: "نرجع لإعادة الإعمار، هندخل في إشكاليات كتير، علشان البناء الدستوري اللي اتحطم، ولما تيجي تعمل دستور حسب بقى الوضع إن كان في تدخل خارجي ولا لآ، وفي مجموعة مصالح ولا لآ، ونقعد نتخانق في موضوع لجنة الدستور شهور طويلة، يا ترى هيبقى عند الدولة والقائمين عليها ساعتها الاستيعاب لأهمية خروج الدستور بعوار أفضل من أن احنا نفضل مكاننا وما نعملش دستور، أنا بقول لآ نعمل دستور ويبقى فيه عوار، أحسن ما يبقاش في دستور ونقعد نتخانق، المؤسسات التي لا تقبل العناصر اللي قامت بالصراع ان يبقى ليها دور، فتفقد الخبرات والكوادر التي يمكن أن تدير الدولة في الظروف الصعبة دي بكفاءة 50%، ونبتدي ندخل ناس ما عندهاش أي خبرة".

وأضاف السيسي: "بقول لكل اللي بيسمعني، إحنا في مصر هنا بنستهلك بترول بـ3,5 مليار دولار في الشهر، بنتكلم في حوالي 42 مليار دولار علشان تقدر تجيب بيهم وقود لبلدك في السنة، أما نخش في خراب ودمار الناس هتعيش إزاي؟".

وتابع: "بقول للشباب من المنطقة بتاعتنا وخارجها" من فضلكم بما فيهم أنا، إحنا محتاجين نتعلم مقومات الدول والحفاظ عليها واستمرارها، لأن في كتير من الناس اللي دارسة كويس لما تحط الصورة الكلية للدولة، تعرف إنه تحدي من أكبر التحديات اللي الإنسانية كلها بتتنافس وتتصارع على استمراره، وأنا بسجل أمام الله سبحانه وتعالى وأمام الشعب والضيوف، أن الحفاظ على الدول هو حق من حقوق الإنسان".