الكفراوي نافيًا شائعة وفاته: "ربنا يجبر خاطر مصر ويهدي ولادها"

كتب- حاتم أبوالنور:

علق المهندس حسب الله الكفراوي، وزير الإسكان والمرافق والمجتمعات العمرانية الجديدة الأسبق، على الأنباء التي تداولتها بعض صفحات التواصل الاجتماعي حول وفاته، مؤكدًا أنه حي يرزق: "أنا بتكلم أهو وبرد على تليفوني بنفسي، ورقمي ما اتغيرش، أنا لسه مصلي وبسمع القرآن بصوت الشيخ محمد رفعت، بمنزلي في السادس من أكتوبر".

وتعجب الكفراوي، وأبدى حزنه على انتشار شائعات بشأن مرضه ووفاته، موضحًا، في تصريح خاص لمصراوي: "في مرة قالوا عليا إني تعبان وماكنتش تعبان ولا حاجة، ودلوقتي قالوا إني مت، وأنا عايش، بتكلم معاكم أهو".

وقال الكفراوي، إن كثرة الشائعات بشكل عام تشير إلى تدني الأخلاق: "أنا مبقتش أتابع أي حاجة سواء تليفزيون أو مواقع التواصل الاجتماعي، لأن مبقاش فيه حاجة تستاهل الواحد يتفرج عليها".

واختتم الكفراوي: "ربنا يجبر خاطر مصر ويهدي ولادها وناسها، ربنا يهديهم"، معقبًا: "متشكر على الاتصال للتحقق من الشائعة بدل الناس اللي نشرت من غير ماتتأكد".