السيسي عن الوعي: مبقلقش لما حد يقول كيلو البامية بـ 100 جنيه

كتب- محمد نصار:

أكد الرئيس عبدالفتاح السيسي أهمية الحفاظ على وعي المواطنين في ظل التطور الكبير الحاصل في الإعلام على مستوى العالم.

وقال السيسي، خلال افتتاح مشروع مستقبل مصر الزراعي، اليوم السبت: على مدار الوقت كله لما بتكلم على إن مشكلتنا في مصر وأي مجتمعات في ظل التطور الكبير في الإعلام ومواقع التواصل هو إزاي تحافظ على وعي ناسك ومواطنيك مش علشان تحافظ على نظامك كدولة، وبكرر الكلام ده كتير وأرجو يصل ليكم أنت بتحافظ على بلدك وأنت راجل بتتكلم على مواقع التواصل انتبه.

وأضاف الرئيس: أنت بتحافظ على بلدك، واللي بتتكلم فيه وهدفه إنك تحافظ وتطور، اوعى اللي بتتكلم فيه ده كله من غير ما تقصد تضيع وتدمر، اوعى، هيبقى الذنب في رقبتك ذنب كبير أوي، لأنك في الآخر هتبقى بتشكل وعي وفهم قد يكون مش دقيق أو مش حقيقي وبالتالي هتحرك الناس في اتجاه مش مظبوط.

وتابع السيسي: أنا مبقلقش لما حد يقول كيلو البامية بـ 100 جنيه لأن المصريين أوعى كتير من كده، لكن إنك تعمل ده وتتكلم فيه كأنه حالة وحكاية.. ده مش صحيح، وحتى لو كان ده الحقيقة مبقولكش غش أو زيف، ولكن فهم الناس.

وأضاف: النبي حُبس وحُوصر في شعاب مكة 3 سنوات وكان سيدنا جبريل بينزل عليه بالوحي، لا الصحابة ولا التابعين قالوله قولهم يجيبولنا ناكل ولا الميه تتفجر من تحتنا، ده ربنا بقى، اللي بيقول كن فيكون، قعدوا 3 سنين لدرجة إنهم وصلوا ياكلوا ورق الشجر، إحنا مش كده، إحنا صلب من كده بكتير.