السيسي: أتمنى ما يتهدش بيت.. ووزير العدل: الأسر متماسكة ونسب الطلاق السنوية 3% فقط

كتب- محمد عمارة وأحمد السعداوي:

قال الرئيس عبد الفتاح السيسي إن صندوق دعم الأسرة سيغطي النفقة وكل المصاريف، وهذه المبالغ ستُفرض على كل مسلم ومسيحي؛ عشان هتتصرف للكل.

وأضاف الرئيس السيسي، خلال احتفالية تكريم الأمهات المثاليات اليوم الإثنين: بقالنا 8 سنين من وأنا وزير دفاع، الغارمات موضوع بيشغلني، وكل شوية نشوف العدد الموجود ويحصل تدخل، ويتم الإفراج عشان يرجعوا بيوتهم، هو عبارة عن إيه، أُم راحت تجيب فلوس أو تجهز بنتها، وماعرفتش ولا قدرت، وطبعًا اتعمل منظومة مؤذية.

واستطرد الرئيس: باقول لكم إن الدولة الحديثة هي دول تنظر إلى كل المشكلات وتعمل منظومة حل مش وجهات نظر، مش جمعية تعمل عمل خيري بس.

وخاطب السيسي حضور الاحتفالية: أرجو متاخدوش كلامي في المواضيع دي إنها حاجة زيادة عن اللزوم، أتمنى مايبقاش فيه أي بيت يتهد أو تنفصل أسرة، كنت عايز من وزير العدل يطمنكم إن الانطباع على حجم الطلاق في مصر مش زي الحقيقة، ده كلام علمي، جبنا إحصائيات دقيقة.

وقال المستشار عمر مروان، وزير العدل: كان فيه رقم سلبي شاع في المجتمع إن نسب الطلاق السنوية 34%، سيادتك وجهت بالبحث بالتعاون مع جميع الأجهزة، وجبنا كل البيانات، اكتشفنا إن النسب السنوية للطلاق 3%، طب جه منين الرقم 34%.. كان فيه خطأ في التنسيب، اللي اتطلقوا مثلًا في 2020 دي زيجات من سنوات سابقة، كنا بنحسب حالات طلاق عن سنة واحدة، نسبة الـ3% موجودة، ونسبة الطلاق عالية في السنة التانية، عملنا في القانون أحكام تحد الطلاق، مفيش حاجة مبنية على هوى.

وتابع مروان: نسبة الطلاق بتقول إن المجتمع بخير وقوي والأسر متماسكة، والنسبة الزيادة اللي شاعت عملت حالة سلبية والكلام ده مش واقعي، نسب الطلاق السنوية 3%، لو عايزين ننسب 10 سنين طلاق، نحط 10 سنين زواج.