"بسمة" في خطر.. حجر طائش يفقأ عينها بـ"قطار الشرقية" وأسرتها: "محتاجة قرنية"

الشرقية – فاطمة الديب

"بنتي بتضيع قصاد عيني ومش عارف أعمل لها حاجة".. بهذه الكلمات بدأت "هناء محمد عباس" ربة منزل من عزبة "الصعايدة" التابعة لمركز الزقازيق بمحافظة الشرقية، تروي لـ"مصراوي" تفاصيل إصابة طفلتها "بسمة" 6 سنوات، بفقع عينها اليمنى وكسر بقاع الجمجمة إثر إصابتها بحجر طائش أثناء استقلالها القطار لحضور عزاء جدها.

إصابات الطفلة فاقت احتمال أسرتها، فيما شدد الأطباء على أنها في أمس الحاجة لإجراء زرع قرنية، وفق ما أوضحته الأم: "بسمة عملت 3 عمليات منهم واحدة في الجمجمة وقالوا لنا إن كان عندها كسر، والعملية الأخيرة الدكاترة قالوا لنا هيفكوا السلك بتاعها يوم الثلاثاء الجاي وبعدها لازم نلحق نعمل لها العملية يمكن نلحقها".

وعن تفاصيل الحادث، تقول الأم: "كنا يوم الأربعاء اللي فات، أخويا كلمني وقال لي أبوكي مات.. مدريتش بالدنيا إلا وأنا نازلة جري وفي إيدي بسمة بنتي علشان نلحق الدفنة، شكلي كنت بجري علشان ألحق قدر بنتي.. لقيت طوبة خبطتها في راسها ووقعت سايحة في دمها".

وتابعت: "اللي كانوا موجود في المحطة لحقوني ونقلناها المستشفى لكنهم حولونا على مستشفى الجامعة وهناك عملولها عملية الجمجمة وبعدها بيومين عملية في عينيها ومن يومين العملية التالتة"، موضحةً أن الأطباء أخبروهم بضرورة زرع القرنية للطفلة في أسرع وقت: "قالوا لنا إنها أول ما تفك السلك هتبقى محتاجة تعمل زرع القرنية دي في أسرع وقت وإننا كل ما بدرنا ممكن نلحقها".

وأوضحت الأم المكلومة أن ظروف معيشتها لن تسعفهم في إنقاذ الطفلة: "جوزي شغال باليومية ويوم فيه و10 مفيش ومش حيلتنا حاجة نبيعها، ولولا ولاد الحلال كانوا ساعدونا نوديها المستشفى كانت زمانها ضاعت مني.. ربنا يكرم أهل الخير يساعدونا ويقفوا جنينا نلحق بنتي قبل نظرها ميروح.. بسمة نفسها تدخل مدرسة زي اللي في سنها وأمنيتي أشوفها مش ناقصها حاجة".