"كنت بشوف حاجات بتتحرك".. المتهمة بقتل "طفل برميل مش": "أنا اللي مربياه"

الأقصر-محمد محروس:

استمعت محكمة جنايات الأقصر لأقوال المتهمة بقتل يبلغ من العمر 5 سنوات وإخفاء جثته في "برميل مش" في ثاني جلسات محاكمته.

تعود أحداث الواقعة عندما تلقى اللواء هشام عبد الغفار ، مساعد وزير الداخلية مدير أمن الأقصر، إخطارا، يفيد بورود بلاغ بالعثور على جثة الطفل "ابراهيم . سيد "، 5 سنوات، مقتولًا بداخل شقة زوجة خاله أميرة.ا وملقي داخل برميل مملح.

وحصل "مصراوي" على نص اعترافات المتهمة في التحقيقات وقالت خلالها: "أنا من 3 سنوات اشتركت في جمعية كبيرة عشان أسهل أمور بيتي، مع واحده اسمها "ا.ح"، وكل واحد هيقبض 35 ألف جنيه في الشهر، ومشي أول شهرين كويس بعدين الجمعية تعثرت، وابتدت الناس اللي أنا مدخلاهم الجمعية يطالبوني بالفلوس ويهددوني وطلع عليا نحو 40 ألف جنيه.

تابعت "أنا اشتكيت لجوزي، راح أبويا وجوزي باعوا الأرض اللي معاهم وسددنا للناس وقفلنا موضوع " ا.ح" ده خالص، ولكن بعدها في فترة كلمتني الست دي تاني في التليفون وقالتلي انتي عليكي فلوس باقية في الجمعية لشخص والشخص وصى ورثته إنهم ياخدوها منك وأهل بيتي وجوزي وحمايا قابلوهم وقالوا متجوش هنا تاني انتوا ملكمش".

أضافت: "بعدين “ا.ح”، بعتتلي شخص قالي إنها بتقولك لو مجبتيش الفلوس هتقتلك عيالك وتولعلك في البيت، وبعد كده أبويا وأعمامي راحو حلو الموضوع ده وفضينا المشكلة دي، وبعد كده عرفت إنها دي بتاعت عمولات وسحر والناس بدأت تقولي إنها هتعملك عمولات عشان الخلافات اللي بيينا، وأنا ابتديت أخاف".

تابعت: "منذ نحو 6 شهور بقت تجيلي قبضة في صدري أول ما بدخل البيت ابتديت أشوف حاجات بتتحرك ونور أحمر في الشقة ابتدت أماكن الحاجات اللي عندي في البيت تتحول من أماكنها وأنا ابتديت أخاف، ويوم الأربعاء 3 أغسطس بعد صلاة العشاء نحو الساعة 8 كان عبد الله ولدي وإبراهيم سيد حساني عندي في البيت وأول ما لقيتهم بيتفرجوا على الكرتون مع بعض رحت بعت عبد الله ولدي يطلع يجيب حلاوة من برا من عند البقال، وكان إبراهيم قاعد بيتفرج على الكرتون كان ساند راسه على رجلي وهو بيتفرج وأنا كنت بطبطب عليه عشان هو زي ولدي مرة واحدة لقيت نفسي بقوله تعالى هفرجك على حاجة جوا رحت وخداه الأوضة اللي بعمل فيها المش رحت مسكاه من إيديه وهو مكنش بيقاوم عشان مش مدي خوانه عشان أنا مرات خاله وزي أمه وهو ياما قعد عندي في البيت ومرباي عندي ورحت شيلاه من إيده وحطاه في برميل المش زرع بصل، راسه تحت ورجليه فوق وحطيت عليه أربع برطمانات مش علشان ما يقبش، ورحت قافلة عليه الغطا البلاستيك وطلعت من الأوضة وقفلتها ونسيت كل حاجة ونسيت حتى اللي عملته".

وأردفت: "بعد الساعة 12 بالليل لقيتهم بيقولوا إبراهيم مش لاقينه، وبيقولوا الواد ضايع وأنا ساعتها مكنتش فاكرة حاجة من اللي عملتها خالص وبقيت أدور معاهم وأبص على الكاميرات وأسأل الجيران لأن إبراهيم كان زي ولدي وكان حتة مني وهو من سن عبد الله ولدي، وأمه كانت علطول بتسيبه عندي، وكان قلبي بيتقطع وهو ضايع لدرجة إني كنت بقلهم خلي المباحث تدور كويس وكنت بطلع ألف في البلد كلها عشان ألاقيه حتى يوم الأحد على الساعة 4 العصر لقيت أبوه سيد حساني، وزوجي بيجري عليا وبيقولوا احنا طلعنا إبراهيم من برميل المش اللي عندي في الشقة وأنا زعقت فيهم كتير وقولتلهم إيه اللي وداه هناك أكيد سقط لوحده بس لما قعد وفكرت افتكرت اللي عملته في الواد وقولتلهم في المباحث كل حاجة حصلت وأنا مش عارفه أنا عملت كده إزاي أنا مكنتش في وعيي ساعتها".

وأشارت إلى أنه لا توجد خلافات بينها وبين والدة الطفل ، وقالت: "إيمان - والدة الطفل- سحبت قرض بـ 30 ألف جنيه بقسط شهري 2360 جنيه وأدتني 15 ألف وقالتي نقسم قسط القرض كل شهر، سددنا شهرين وجات في التالت اتعثرت قالت مش قادرة أدفع وقالتي انتي ادفعي قسط شهر 8 وأنا القسط اللي جاي هدفعه وهو ده كل اللي حصل، إيمان دي اختي وإبراهيم ابنها ده كان زي ابني بس أنا قتلته ليه ما اعرفش عملت كده ازاي، أنا مش هقتل طفل عشان ألف جنيه".