كاتبة أسماءهم في كراسة.. "الحاجة اعتماد" أنجبت 15 ولديها 145 حفيدًا - صور

البحيرة - أحمد نصرة:

"فاطمة تعلبة" بهذا اللقب يداعب أبناء الحاجة "اعتماد العطفي" والدتهم، لما يرونه من أوجه تشابه بينها وبين هذه الشخصية الدرامية التي أدتها الفنانة هدى سلطان وعلقت في أذهان كثير من المشاهدين.

ويربط أبناء الحاجة اعتماد بين سمات والدتهم وسمات شخصية بطلة مسلسل الوتد، من قوة الشخصية والصرامة وحبها وتفانيها وتحملها مسؤولية أبنائها وأحفادها.

تقول الحاجة اعتماد التي تجاوزت الثمانين عامًا: "خلفت 15 ولد وبنت، عاش منهم 11، جابولي 145 حفيد وكلهم بيزوروني ويودوني ورايحين جايين عليّا، لكن من كترهم بقيت بتوه فيهم وكاتبة أسماءهم في كراسة".

وتضيف: "أنا أساسًا من أسيوط واتجوزت ابن خالي، وجينا هنا البحيرة في إيتاي البارود، اتجوزني بمهر 5 جنيه بس، لكن ربنا فتح عليه من شغله في جناين الفاكهة، ووراني أحسن أيام في حياتي، وجابلي بعد الجواز كيلو وربع دهب".

وتكمل: "زوجي توفى من 10 سنين و8 شهور و18 يوم، عداهم يوم بيوم من كتر حبي ليه لأنه كان مهنيني أنا وعيالي وساب لنا اللي يعيشنا مرتاحين طول العمر".

وتوضح: "سبب الخلفة الكتير إني اتجوزت بدري وعيالي نفس الشىء، مفيش حد بيعدي 18 سنة غير لما يكون متجوز، وعندي بعض الأحفاد متجوزين وجابوا عيال".

وتستطرد: "كنت الحمد لله قوية وبصحتي وأثناء مرض زوجي حاول ناس يحطوا إيديهم على أرضنا لكن وقفت لهم بنفسي، ولما كان بيبقى فيه قعدة حق، كنت بقعد وسط الرجالة وآخد حقي وحق ولادي بالأصول".

وتختتم الحاجة اعتماد حديثها: "الخلفة الكتير كانت حاجة طبيعية والحمد لله علمت أولادي كلهم، لكن دلوقتي مع الظروف الاقتصادية، مش أي حد يقدر يخلف عدد كبير".