تامر أمين: لم ولن يأتي برنامج بقوة البيت بيتك

كتب – معتز عباس:

أكد الإعلامي تامر أمين، إنه رفض اشترك فيما أسماه "المهزلة" الإعلامية والسياسية التي حدثت بعد ثورة 25 يناير 2011 ، موضحًا: "بعد الثورة اتقال تامر أمين خلاص راحت عليه، ولكن الأيام أثبتت حسن موقفي، والدليل إني اشتغلت في أهم القنوات مثل قناة الحياة، والآن النهار".

وقال "أمين" خلال لقاءه ببرنامج "شيخ الحارة والجريئة"، تقديم المخرجة إيناس الدغيدى، المذاع على قناة "القاهرة والناس"، ساخرًا: "وائل الإبراشي يقدم التوك شو بتاع التليفزيون المصري علشان ساكن جنب التليفزيون"، متابعًا: "التليفزيون دا بيتي وبتشرف بيه، والاتصال كان مفتوح مع المسئولين طول السنين اللي فاتت للعودة، ولكنى كنت بشوف أن العودة لابد أن تكون على مستوى البيت بيتك لأن الناس هتقارن.. وبرنامج وائل الإبراشي مش زي البيت بيتك .. البيت بيتك ماجاش زيه".

وعن هجومه على الفنانة شيرين، أضاف، قائلًا: "شغلتى غير شغل شيرين عبد الوهاب، وهى في الغناء عظيمة، ومن أفضل الأصوات اللى جت فى مصر ، ولكن ده مالهوش علاقة بهجومى عليها .. أنا لما بدخل الأستوديو بنسا كل حاجة .. قمة المهنية إني أنسى صداقتي للأشخاص على الهواء".