حسام البدري يرد على تسببه في اعتزال عماد متعب (فيديو)

كتب- مينا غالي:

قال الكابتن حسام البدري، المدير الفني السابق لمنتخب مصر ردًا على كونه السبب في اعتزال نجم الأهلي السابق عماد متعب: "لا خالص.. وعماد يمكن وضّح بعد كده.. عماد من المقربين ليّ وبحبهم على المستوى الشخصي.

وأضاف خلال استضافته ببرنامج العرافة على قناة المحور مع بسمة وهبة: "أي لاعب وهو بيلعب لما بيتدي يبعد عن الملعب بيبقى شئ صعب، لكن هو قال كلمة أنا هبني عليها كلام كتير وهي: "ياريت كابتن حسام كان بقى صريح معايا من الأول".

وتابع: "في وقت ممكن يبقى عندي رأي في اللاعب وفي حالته، ومينفعش تتقال للاعب لأن خلاص بتبقى صعبة عليه، لأنه لو بيبتدي يبعد عن الملعب بسبب عامل السن، لو اتكلمت في حاجة من دي بشكل صريح بالعكس أنا بأثر عليه نفسيا كأني بقوله أنت بتبطل، وده مش مطلوب من لاعب كنت حريص على إنه يستمر لأطول فترة ممكنة".

وواصل البدري: "عماد لاعب كبير جدا ومصر محتاجة حاليا لاعب مثله.. لكن المدرب بيحدد متى يستخدم اللاعب علشان يفيد فرقته.. أنا مبوعدش لكن بحافظ على اللاعب وبأهّله علشان أستخدمه في التوقيت الصح وأستفيد منه للفريق".

واستطرد البدري: "في الوقت ده عماد كان المفروض يقتنع أن وقت المشاركة بتاعه قل، ما يقدرش يلعب 90 دقيقة، هو مقلعش التيشيرت لكنه غضب لما كنت بغيره.. هي سنة الحياة في وقت بيكون صعب على اللاعب وبيعتقد في نفس الوقت أن المدرب بيتلكك له".

وقال: "عماد متعب بعد لما مشيت كان في السعودية، وقبل ما أمشي جاله عرض من نادي التعاون وطلب مني يمشي فوافقت علشان يستفيد، وعماد رجع من السعودية لأنه مُعار، لكنه لم يقيد هذه السنة وخد قرار الاعتزال رغم إني لم أكن موجودًا".