بعد الهجوم على رحمة أحمد.. عمرو أديب: "أرفعوا ايديكم عن مربوحة"

كتب- محمد أبوالمجد:

علق الإعلامي عمرو أديب، على الهجوم الكبير على الفنانة رحمة أحمد، بعد عرض أولى حلقات مسلسل الكبير الجزء السابع، والذي يعرض في شهر رمضان، قائلًا: "الناس اللي بتهاجم مربوحة في حد بيقتل حد كده؟ دا لايمكن يبقى شيء طبيعي".

وقال "أديب" خلال تقديمه برنامجه "الحكاية" على فضائية "إم بي سي مصر 2" اليوم السبت: "أنا معرفش رحمة ولا عمري شوفتها، ولا المسلسل دا تبع القناة بتاعتنا، لكن ازاي الهجوم دا كله عليها هي لحقت دي عملت حلقتين فقط، وبعدين ازاي الهجوم كده، مهي السنة اللي فاتت كانت أعظم حاجه، والسنة دي ملحقتش تعمل أي حاجه".

وتابع: "عرفنا أن في لجان معمولة على مربوحة، طب إزاي دي ممثلة صغيرة متستحملش إنها تتقتل لمجرد حلقتين، ويتقال بقت بايخة أو مبتضحكش طيب يا جماعة مهو في كاتب ومش مسؤوليتها لوحدها"، موضحًا: "أرحموا الناس يا جماعة، وإذا كان في لجان وراء البنت هتبان مين وراها واللي يعمل كده يبقى إنسان حقير".

وأردف: "المنافسة في الفن بالشكل دا لو صحت تبقى شيء حقير إننا نستخدم لجان عشان نخلص على حد، طب حط نفسك مكان البنت في تاني مسلسل لها تفتح تلاقي هجوم كأنها قامت بجريمة أخلاقية"، مضيفًا: "عايز الناس المحترمة تقف جنب الناس اللي بتبدأ حياتها، وإحنا ياما وقفنا مع ناس واخدنا بايديهم ومش عايز أقول اسامي 20 اسم كانوا بيتداسوا ولكن كان في سندة مننا".

وأكد: "ارفعوا إيديكم عن مربوحة لو في نقد فني تمام إنما دبح بالشكل دا لا، لأن في فنانين كتير ليهم شكل بيكملوا عليه كتير أوي، لكن تتعمل لجان على بنت صغيرة زي دي ايه الهدف يعني".