خالد الصاوي: "كنت خايف بعد العملية مقفش على رجلي تاني"

كتب-محمد أبوالمجد:

أكد الفنان خالد الصاوي، أنه حينما أصيب بالانزلاق الغضروفي في عام 2013، كان له بوادر قبلها بعامين، وأن الغضروف كان موجود في القنوات العصبية رغم تحمله للألم وتعامله مع المرض بجنون، قائلا: "كنت بقعد أقول لنفسي أني معجزتش وأن الرجالة متعيطش وكان عندي نظرية غريبة لو جالك وجع في مكان أوجعه عشان يروح، ولما تعبني قوي عملت عملية".

وأضاف "الصاوي" في حوار مع الإعلامية منى عبد الغني، في برنامج "أنا والقناع"، على فضائية "الحياة"، مساء اليوم الأحد: " أنه خاض عملية جميلة وناجحة وعاد لعمله وبعد 9 سنوات عاد التعب مجددًا العام الماضي، ومن كتر ما أنا مضايق وقلت لو فتحت جراحة تاني ممكن يقلب سوسته والدنيا تبوظ".

وتابع: "الألم بقى شديد واضايقت جدًا وكنت في مكتبي وفضلت أضرب رجلي في الأرض والوجع زاد لدرجة أني كان هيغمى عليا، وكان نبضي جامد وعرق شديد وحسيت بألم جديد"، موضحًا: "فكرة إنى هخش تاني أعمل عملية جراحية موصلتش للمرحلة دي".

وأردف: "كنت بقول لنفسي أنا ممثل لازم اشتغل على أيد ورجل وعين وأنا مزعج حتى للي بيعالجني، وروحت عملت علاج طبيعي ومش قادر استحمل، وطلبت أعمل تمارين بالعوم أو البوكس"، موضحًا: "فكرة أن السوق كله يعرف أني في حالة مش كويسة ممكن كنت أقعد في البيت طيب هشتغل ازاي فكنت خايف مقفش على رجلي في التمثيل تاني وكان بيجيلى الهاجس ده جامد".