بدون عمليات أو "دايت".. سيدات يروين لـ"مصراوي" كيف خسرن 50 كيلو

شروق 29 سنة 150 سم (من 87 إلى 51 كيلو)

"قررت أغير وزني لأني كنت حابة أزود ثقتي بنفسي، خصوصًا إني وقتها كنت لسة في الكلية وكان حواليا بنات شكلها حلو جدا".

"الموضوع كان تحدي كبير جدا بالنسبة ليا، وبدأت أمشي كتير جدا، لكن وزني زاد تاني، لما اتجوزت وخلفت، وبدأت من جديد، لكن وقتها كان عن علم ودراسة، وحاليا أنا مدربة معتمدة واختصاصية تغذية".

"ناس كتير فاكرة إن البطن بعد الولادة مش هيرجع لكن بالرياضة، بتبقى أفضل بكتير من قبل الحمل كمان، والستات في مصر بتفكر إنها هتخس بعد الولادة مباشرة، وفي نفس الوقت هي بتاكل كتير جدا بدون نظام وأكل غير صحي جسمها مش محتاجه، ونلاقيها بتقول إن البطن مش بتروح".

"عمري ما روحت جيم، أنا كل حاجة عملتها في البيت لأني بشتغل ووقتي ضيق، ووصلت للوزن ده وشكلي ده من البيت، أنا بلعب ساعة يوميًا، وعندي يومين راحة في الأسبوع".