"لسه بدري أوي".. السيسي يتحدث عن جني ثمار الإصلاح الاقتصادي

كتبت- ياسمين محمد:

قال الرئيس عبدالفتاح السيسي، إن ما شهدته مصر من إنجازات خلال السنوات الماضية، يمثل جهد المواطنين: "كل المصريين اشتغلوا، وقبل كدا كمان كان المصريين بيشتغلوا، هي مصر اتعملت غير بشعبها؟" موضحًا أن قيام الحضارة يتطلب العمل بالجد والإتقان والمثابرة.

جاء هذا خلال كلمته، باحتفالية عيد العمال، التي ينظمها اتحاد عمال مصر، اليوم الثلاثاء، بمحافظة الإسكندرية.

ونوه الرئيس إلى القرارات الأخيرة المتعلقة بزيادة الأجور والمعاشات: "إنتوا بتقولوا ده ثمار الإصلاح، ثمار إيه هو إحنا عملنا حاجة، والله العظيم أنا صادق معاكم لسه، لو فاكرين إن زيادة الحد الأدنى للأجور ثمار للإصلاح، يبقى اضحك عليكم، لسه بدري أوي، عمل يساوي العمل ده مئات وآلاف المرات، الدول مش بتبطل شغل؛ لإن المنافسة مش بتنتهي".

وتابع: "أوعوا تتصوروا إن الإجراءات اللي أعلنت خلال الكام أسبوع اللي فاتوا دي ثمار الإصلاح، ده إشارة إننا يامصريين عندما نتحمل إجراءات قاسية بكل ما تعنيه هذه الكلمة، لكن المسؤولية هي المسار اللي نجحنا، النجاح كله هو الاستقرار والأمن، حتى الاستقرار الاقتصادي لا يتحقق إلا بالعمل".