مدبولي: لا نستطيع نقل شركات قطاع عام للصندوق السيادي "عايزين ننقله حاجة نضيفة"

(مصراوي):

علق الدكتور مصطفى مدبولي، رئيس مجلس الوزراء، على أراء عدد من الخبراء الاقتصاديين، الذين تحدثوا في جلسة دور صندوق مصر السيادي وفرص المشاركة مع القطاع الخاص في المؤتمر الاقتصادي مصر 2022.

وقال رئيس الوزراء: "إحنا كحكومة قلنا خطتنا بعمل طروحات وقلنا بنستهدف عدد معين، لكن الهدف الأساسي هو الاستفادة من أصول الدولة ولما بنطرحها بنتيح فرصة للطرح العام للمواطن وحتى القطاع الخاص ليزيد من قيمة هذا الأصل، لكن فيه نفس الوقت فيه هدف مهم وهو تحقيق أفضل عائد مادي من هذا الطرح".

وأضاف مدبولي: "اللي بيحكم ده بمنتهى الأمانة ظروف البورصة، اللي بيساعدنا في ده بنوك متخصصة، تقول للحكومة إيه أفضل توقيت للطرح".

وأوضح رئيس الوزراء: "بقالنا 3 سنين في ظروف شديدة الاستثنائية، البورصات كلها بتعاني وعلى الأخص المصرية، لازم نتحسب لاختيار الوقت المناسب، بنعمل على تحضير عدد كبير من الشركات، لما بنتكلم على طرح آي فينانس، الموضوع بيستغرق سنة، لأننا بنعمل فحص نافي للجهالة، ونصل للتقدير الأمثل للأصول، بنشتغل على عدد كبير من الشركات، نرجع تاني ونأكد، لازم نختار الوقت الأنسب، وإلا المواطن البسيط يحاسبنا ويقول إزاي تفرطوا في أصل بهذه القيمة".

وتابع: "نتكلم على الصندوق السيادي، ووزير التخطيط هي رئيسة الصندوق، هدف الصندوق هو تعظيم الاستفادة من أصول الدولة كلها، وإحنا شغالين بالتدريج، نبدأ بالأسهل عشان نفعل دوره، نقلنا له أصول على رأسها مجمع التحرير وكان فيه طرح ناجح جدا، وبنحضر قائمة أخرى وكل شوية بنزودها، لأن قانون الصندوق فيه مرونة أكبر من أي مكان في الدولة".

واختتم رئيس الوزراء تعليقه: "نتحرك أيضا على نقل شركات تابعة للدولة إلى الصندوق عشان يبدأ إنه يجهزها للشراكة مع القطاع الخاص، وده أصعب جزء، وحضرتك -يقصد هاني سري الدين- أشرت لشركات القطاع العام، خلينا نتكلم إن هذه الشركات فيها تحديات كثيرة، أحجام عمالة ضخمة أكبر بكتير من اللي المفروض تكون موجودة، وأيضا مكبلة بالخسائر، لو نقلتها للصندوق هعطله، أنت عايز تنقله حاجة نضيفة، عشان كدة بنختار بدقة أيه هي الشركات اللي تتنقل وتحقق الهدف، بالفعل إحنا شغالين على هذا الموضوع، إحنا عندنا بسم الله ما شاء الله مئات الشركات، بنختار شركات تكون نسب نجاحها لما تتنقل للصندوق، تكون سهلة، لو نقلت له شركة س بتحقق خسائر وفيها 50 ألف عامل، الصندوق هيعمل أيه، الصندوق دلوقتي بيدرس هذه الشركات، الصندوق عمره لا يتجاوز عامين، بناخد الموضوع تدريجيا عشان نضمن النجاح".

​