الأمور بدأت تتحرك.. رئيس اتحاد الصناعات عن موعد انخفاض أسعار السلع

كتب- أحمد السعداوي:

قال المهندس محمد السويدي، رئيس اتحاد الصناعات، إن الصناعة هي خط الدفاع الثاني لمصر، والمصانع لم تتوقف في أحداث 2011 و2013.

وأضاف السويدي، خلال افتتاح وتدشين مشروعات المبادرة الوطنية لتطوير الصناعة "ابدأ"، بحضور الرئيس السيسي، اليوم السبت: اللي شُفناه يوم الخميس يقول إنه قبل الشهرين نظام الاعتمادات المستندية ينتهي إن شاء الله، والفترة المقبلة هيكون فيه انخفاض في أسعار بعض السلع؛ لأن الأمور بدأت تمشي وتتحرك.

وتابع رئيس اتحاد الصناعات: في الأزمات بنتعلم إزاي نغير ونضيف عشان ما نواجهش أزمات زي دي، في أزمة كورونا مثلا مفيش مصنع توقف عن العمل.

وواصل رئيس اتحاد الصناعات: عايزين نحول معامل الجامعة إلى معامل اختبار الخامات على مستوى مصر.. عندنا خطة لزيادة الصادرات في فترة من 3 إلى 5 سنين لـ 100 مليار دولار، وهنقدم خطة خلال 3 أشهر؛ عملية المعامل والاختبارات التابعة بتساعد جدًّا.

واستطرد السويدي: عندنا تحدٍّ؛ لكنه واعد جدًّا، وهو قطاع المحاجر والمناجم، وهو واعد جدًّا، بعد ما جربنا في خلال عامين ماضيين، المدد اللي بتطرح للمستثمر لإدارة المنجم مش بتبقى كافية، أنا لو حضرتك تسمح يكون ليها جلسة خاصة، وفرصة إنها تشتغل وتساعد على النمو الحقيقي.

وقال السويدي: المهندس شريف إسماعيل، كان بيقول لي أنت كل يوم تكلمني على الغاز وأسعار الغاز، وطبعًا الإضرابات العمالية الكل كان يعلم كل شيء.. وأزمة النقد الأجنبي بدأناها 2014 وعانينا حتى 2016، كل شركة لها مستحقات اتفقنا أنه سيتم التقسيط إزاي، كانت البيئة التشريعية تمثل تحديا، وتم إطلاق قانون 5 لتفضيل المنتج المحلي، وهاخد من كلام حضرتك، ساعات في التنفيذ الإدارة مابتشوفش الأمر، لكن هناخد مثل حضرتك عملته في مشروع حياة كريمة، كان مفصل بتوقيتات، واجتمعنا بالدكتور مدبولي، وبعتناه لكل نظرائنا في الخارج.. احنا من أكبر الدول في المنطقة اللي فيها مشروعات في كل المجالات.

واستكمل رئيس اتحاد الصناعات: عايزين نحيي قرار يوم الخميس وهو تحرير العملة، هو قرار فيه تحد كبير جدًّا، لكن أعطانا الضوء والارتياح التام في العمل، كان عندنا تخوفات، حضرنا المؤتمر الاقتصادي، وكله اتكلم هتعملوا إيه في البضائع، القرار خلى البضائع تخرج، ما حدث لا يؤدي إلى زيادة السعر، نهائيًّا، مفيش بضاعة، وفيه عجز، الأسعار ترتفع، دلوقتي الكل هيشتغل وده هيعمل وفرة، طول عمرنا داعمين للدولة، بنحيي الحكومة على قرارات الأربعاء، لأننا عارفين المواطن بيعاني إزاي، إحنا في القطاع الخاص هنزود الحد الأدنى، ولازم الكل يشيل المسؤولية.

وقاطع السيسي رئيسَ اتحاد الصناعات قائلًا: يعني يا بشمهندس كام؟ احنا مع القطاع الخاص بنبقى حريصين أوي عشان كل منشأة لها ظروفها؛ لكن قُل لي كام.

ورد السويدي قائلًا: الكل هيترفع 300 جنيه، أغلب القطاعات زودت في ظل الظروف الحالية، لأننا حاسين بالغلاء، ليتابع السيسي: احنا بنحييكم على هذا.

وتابع السويدي: المستثمر لما ييجي يبص على البيئة التشريعية والطاقة والعمالة، والحمد لله ماعندناش أزمات، احنا عندنا فرص كبيرة للنمو وطلبات كتير لشركات عايزة تشتغل، بس بيلاقوا بعض التحديات، ماسيبش المستثمر يروح بلد تانية، يعني لو رخصة ذهبية للكل.

وقال الرئيس السيسي: طب المفروض احنا بنشتغل عمل مؤسسي، احنا هندي الرخصة الذهبية لكل المتقدمين لمدة 3 أشهر، لكن أرجو واحنا بنتحرك وبنفتح الباب على آخره، السبب اللي انتوا بتعانوا منه احنا بنعاني منه، أصل مش انتوا واحنا، على العموم، 3 شهور لكل متقدم، ونبذل جهدًا لمدة 3 أشهر ونراجع، ولو لقينا حجم الإنجاز كان مشجعًا نقدر نفكر نستكمل أو نرجع للنظام القديم.

واستكمل السويدي: اتفقنا مع وزارة التعليم، نخش نرعى المدارس الفنية، وماضيين من أيام الدكتور طارق شوقي، واتفقنا نبدأ نرعى المدارس الفنية لأنها مسؤولية، هناخد المدرسة من الحكومة واحنا هنكمل، هناك مبادرة فيه صندوق التدريب التابع لوزارة القوى العاملة.​