محمد سامي: محمد رمضان متصنف فتوة الشعبيين زي فريد شوقي و"جعفر العمدة" مالوش إلا جزء

كتبت- منال الجيوشي

علق المخرج محمد سامي على نجاحه الدائم مع الفنان محمد رمضان وسبب حبه له والعمل معه.

وقال سامي خلال استضافته ببرنامج "أسرار" مع الإعلامية أميرة بدر، المذاع على قناة النهار: "محمد رمضان ممثل مهم وموهبة مهمة، ولكن مهما كان فهو في احتياج لفريق عمل قوي حواليه ومخرج قوي، هو عنده كاريزما لكن مش مسئول عن كل العناصر".

وأضاف سامي: "اشتغلت مع غادة عبدالرازق والسقا وتامر حسني لكن شغل محمد رمضان كان نجاح استثنائي، وده بسبب إن كيميتنا راكبة أوي مع بعض، وبنفهم بعض بالاشارة".

وتابع: "محمد رمضان طيب ومش بيفكر ينجح مع حد غيري عشان يثبت حاجة معينة لأنه مش بالشر ده، وهو نجم مبالغ في نجوميته وهو عارف إنه ناجح دايماً".

وأضاف سامي قائلًا: "محمد رمضان متصنف فتوة الشعبيين لأن فريد شوقي فضل كده طول عمره، وأنا ضد تغيير جلد الفنانيين، لان احمد زكي فيه حاجات مصدقتوش فيها وانا اقل من اني اقيمه، لكن الأستاذ عادل إمام هو الأنجح ع الاطلاق، وهو البهجة والانبساط ووظف نفسه حلو وعمل كل حاجة".

كما أضاف سامي عن عمل جزء ثاني لجعفر العمدة قائلًا: "جعفر العمدة مالوش إلا جزء، فكرة الجزء التاني فكرة المنتج محمد السعدي وكنا رافضينها أنا ورمضان وكتبت منه ١٧ حلقة محبتوش، لأن ليه أعيد أجزاء وتكرار لما ممكن أعمل حاجة تاني وأنجح بيها".