شريف مدكور عن واقعة كشري التحرير: جبر الخواطر فين؟

كتب- مينا غالي:

هنأ الإعلامي شريف مدكور، أقباط مصر بمناسبة عيد دخول السيد المسيح أورشليم المعروف بأحد السعف، وكذلك خميس العهد (الخميس المقبل)، والجمعة الحزينة وسبت النور وأحد القيامة.

وقال مدكور في لايف عبر صفحته على موقع التواصل الاجتماعي فيسبوك: الفيديو ده عايز أقول فيه شوية حاجات حصلت الأسبوع الماضي ولم أعلق عليها، وانتظرت لما الدنيا تهدأ علشان أتكلم.. احنا كلنا مصريين وأصحاب الأرض دي وبتربطنا ببعض ثقافة ورثناها من أجدادنا المصريين القدماء.. كلنا دم واحد وأنا مبقولش الكلام ده نفاق ولا رياء.

وأضاف مدكور: من ضمن اللي حصل الأسبوع ده موضوع السيدة اللي دخلت مع بنتها محل علشان تاكل أكلة وحصل اللي حصل ده.. هوجه كلامي للمسلمين: أنا لو عندي محل أكل وأنا مسلم وصايم والاستاف اللى معايا ممكن يكونوا مسلمين ومسيحيين، قعدت أتخيل لو أنا صاحب المحل أو جرسون فيه ودخل لي أم ومعاها ابنها أو بنتها وقالوا لي عايزين من الأكل ده، طبعا هقعدهم وأجيب لهم ترابيزة والأكل وههزر مع الطفل ده وأقوله يلا بقا علشان تكبر وتصوم.

وتابع: ثقافتي وديني ربوني على كده.. جبر الخواطر فين؟ نطبطب على بعض فين؟ ديني وقرآني وسنتي علموني أبتسم في وش الناس وماحرجش الناس وأجبر بخاطر الناس.. ما أحسسش حد بالعكس.. الدين الإسلامي مفيهوش ده يا مسيحيين مصر، فالرسول تزوج من ماريا القبطية المصرية.

وواصل: وقعدت أفكر لو أنا رجل دين كنت هكتب بوست موجه لصاحب المحل وأقوله: كنت المفروض تقعدهم وتضايفهم وتجيب لهم مياه يشربوا، لأن أنت مش هتفرض عليهم الفريضة الموجودة في دينك.. أنت دينك فرض عليك أنك تضوم رمضان، مالكش دعوة بغير الصايم.