بداية جديدة/ بشويش

بشويش .....كلمتين بيطلعوا من القلب بكل سلاسة وهدوء وحب مترتبين بيكونوا في هيئة عتاب نصيحة توجيه مناقشة بصوت هادئ ومريح يوصلوا للقلب بسرعة ......يعني إيه ؟؟؟

يعني أسلوبك وطريقتك ونبرة صوتك بتخليني أقتنع أن الغلط صح والصح غلط بتخليني أشوف وأسمع حاجات ما بين السطور ماكنتش مرئية ولا واضحة بالنسبة ليا، نجاح أي تجربة أو مناقشة بيبقي ناتج عن عدة عوامل منها أداء الطرفين أثناء الكلام اختيار الألفاظ والعبارات والهدوء والسلاسة والبساطة في المعاملة قادرين أن يجدوا حل لأي مشكلة مهما كانت أو بمعنى أصح نوصل لنصف الحل أو نقطة اتفاق .

كتير منا بيسمع وبيشوف كل يوم مواقف ومشاكل وحلول ويبتدي يختار فرد واحد يعرض عليه مشكلته ويرغب في الحديث معه دون الالتفات للآخرين مع أنه حواليه ناس كتير ممكن تسمع وتحل وتقول رأيها بكل صدق وأمانة وموضوعيه شديدة ويمكن أيضا يكون عنده الحل ولكننا نرفض حتى مجرد الاستماع أو اللجوء إليهم ... حد سأل نفسه إيه السبب؟؟؟

السبب هو البشويش أسلوبك الهادئ المريح اللي طالع من القلب هو ده السبب هدوئك هو سر نجاحك أسلوبك اللين والكلمة الطيبة وتطييب الخاطر له بريق أكبر وأقوى من السحر الكلمة اللينة التي تذيب الحديد بتجبر أي انسان أن يلجأ اليك وقت ضعفه أو حت وقت قوته.

البشويش مش مجرد كلمة حلوة بتتقال ولا ايد تتمد لك وقت الاحتياج هو أسلوب تتبعه في حياتك لنحاجك انت اولا ولنجاح علاقاتك بالآخرين ...

ربنا في كتابه العزيز قال "ولو كنت فظا غليظ القلب لانفضوا من حولك"....الكلمة الطيبة صدقة جارية، ماء يطفئ أي لهيب مشتعل .

جرب كده البشويش في حياتك، ويبقى أسلوب حياة وطريقة تفكير ونمط وخطة معينة يتم رسم طريق لها، وأنا على يقين وحقيقة لا تقبل الجدال أن كل حياتك سوف تتغير حرفيا إلى الأفضل لأن ده كلام ربنا مش كلامي ....

وعند تنفيذ هذا الأسلوب الجديد في حياتك سوف تصل لمرحلة مختلفة مليئة بالنضوج والراحة والاستقرار النفسي والسلام الداخلي .....

ومن هنا تبدأ مرحلة حياتيا جديدة وبداية جديدة ....

بداية جديدة