الفنان صبري عبدالمنعم: "شفت العدرا وسيدنا النبي.. ولما رحت له المدينة قابلني بالكرامات"

كتب- أحمد عبدالمنعم:

كشف الفنان صبري عبدالمنعم عن علاقته الوثيقة بالله والرؤى التي يراها بين الحين والآخر ورؤيته للنبي صلي الله عليه وسلم.

وقال "عبدالمنعم"، خلال حواره في برنامج "كلم ربنا مع أحمد الخطيب"على الراديو 9090،:"شفت العدرا وكلمتها وكلمتني وشفت رُسل وأنبياء وصالحين بعيني، وشفت حضرة سيدنا النبي كتير جدًا الحمد لله، ولما روحت له المدينة وزرت الكعبة الشريفة شاهدت من النور والكرامات والنفحات اللى يسعد أي إنسان".

وأضاف: "ربنا سندي في كل حياتي وفي شدتي وفي كل لحظة صعبة، وأنا اتعرضت في حياتي لمواقف أصعب من بعض، ومعرفش لحد النهاردة عديت منهم إزاي".

وتابع: "أكتر موقف كلمت فيه ربنا وناجيته بالدموع لما أبويا أصر يدخلني ثانوي فني وأنا كنت عاوز أدخل ثانوي عام علشان أروح معهد فنون مسرحية، ويشاء ربنا إني وأنا داخل المدرس الثانوية الميكانيكية ألاقي قاعة أسمها المسرح المدرسي وبيجيبوا لنا أساتذة وخريجين من معهد الفنون المسرحية علشان يدربونا ويعلمونا مسرح".

وأضاف: "الحمد لله ربنا راضاني وأوجد لى الشئ اللى انا بحبه في المكان اللى مكنتش عاوز أروحه، وبعدها ذاكرت ثانوية عامة علشان أدخل المعهد، وقتها بكيت بكاء شديد وقلت ومازلت بقول في كل دعاء وبعد كل صلاة "علمك بحالي يُغني عن سؤالي".