اخر بق في كوباية اللبن!

اتجوزت وعرفت ان سبت الغسيل الفاضي إنجاز عظيم وفخر وحرفنة وحاجة كدة تجيب انبساط ملوش حل..
عرفت ان اخر يوم في الانتي بيوتك لولادنا بنستناه اكتر من ما بنستنى العيد..
عرفت ان اخر بق في كوباية اللبن دة بيفرح القلب اكتر من هدية خزعبلية..
عرفت ان ولادنا مبيبلعوش غير بصريخ محتواه "ابلع يا حبيبيييييي" "ابلعي يا حبيبتيييييي!"
عرفت ان الاجازة مش اجازة خالص! ديه اكسترا شغل اكسترا زن اكسترا مامي ماااامي مامي مااامي ماااامي اكستر مطبخ كدة يعني!

عرفت ان السفر مش فسحة اطلاقاً! دة غسيل وتنضيف بيت وجري عالرمل والبحر وتحمي ديه وتلبسي ده وترجعي اخر السفرية بستين كيلو غسيل!
عرفت ان البيت اللي ريحته ديتول ومتنضف احسن بكتير من سفرية حول العالم!
عرفت ان الدش اللي بناخده بعد تنضيف البيت وقعدتنا على الملاية الجديدة اللي ريحتها داوني دة سعادة وانبساط ملهمش وصف!
عرفت ان اخر معلقة في طبق الغدا وآخر قطمة في الساندوتش الريتش بيك بالدنيا وما فيها والله!

عرفت ان عرض البرسيل اجمل بكتير من بوكية الورد!
عرفت ان صوت قفلة الباب بعد ما ولادك ينزلوا المدرسة اجمل من صوت سيمفونية بيتهوڤن!
عرفت ان شكل السرير المتروق وملايته مشدودة كدة اجمل بكتير من اي حاجة في الدنيا..
عرفت ان نهاية اليوم اجمل بكتير من بدايتة!

وعرفت برضو ان المشي على الارض وهي لسه ممسوحة ديه جريمة تستحق أقصى درجات النكد والخناق وقلبة البوز!

حقيقي مش هيحس بالسعادة اللي في السطور اللي فاتت غير الأم اللي بتحاول دايماً توصل لمرحلة "آخر" قطمة ومعلقة وبق وتفضل تحارب لحد ما توصل لـ "اخر" اليوم"!
مليون تحية لكل زوجة وأم انتوا بطلات..